João Zacarias mós komprimenta ona Primeiru Ministru Taur Matan Ruak, hanesan enkontru nu’udár membru governu husi KHUNTO ba dala ikus nian, iha tersa (16/06).
"Ohin mai hasoru Primeiru Ministru koa'alia kona-ba ha’u nia pozisaun. Tempu to'o ona atu entrega fali ba maluk sira. Tanba ne'e, ha’u prontu kumpri opsaun saida de'it, inklui kualkér desizaun ne’ebé nai ulun sira foti", hateten Zacarias hafoin enkontru ho PM Taur iha palasiu governu.
Zacarias hateten, hahú ohin ba oin, nia hanesan ona ema independente no iha tempu oin mai, sei ko’alia barak kona-ba pozisaun ne’ebé nia assume durante tinan rua, tanba hakarak atu defende lia los.
"Ha’u agora dadauk hanesan ema independente no iha tempu oin mai ha’u sei ko'alia barak koan ba ha’u nia pozisaun. Husu ita hotu hein, tanba lia loos sei mosu mai no obrigasaun atu defende lia loos. Nu'udár Timor oan sei kontribui nafatin, maibé defende lia loos no kontra buat ne'ebé lalos. Tanba ne'e ha’u la preokupa KHUNTO atu foti se de'it hodi mai troka ha’u tanba hau la’ós ona KHUNTO nia ema", tenik nia.
Zacarias mós prepara ona relatóriu servisu durante mandatu tinan rua atu entrega ba ema ne’ebé KHUNTO sei nomeia atu hala’o hikas kna’ar nu’udár Vise Ministru Edukasaun Juventude no Desportu.
Entretantu, Zacarias simu pose nu’udár membru VIII governu konstitusionál husi Partidu KHUNTO hamutuk ho membru governu na’in 28 iha palasiu Nobre Lahane, Dili, iha Sesta 22 Juñu 2018.