Prezidente Parlamentu Nasionál (PPN) Aniceto Longuinhos Guteres hateten, deputadu hotu-hotu aseita no fó autorizasaun ba governu, hodi halo levantamentu estraordinária ba fundu petrolífeiru, iha de’it mak diferénsia ideia ba pedidu refere atu trata urjénsia ou prosesu normál, tanba ne'e desizaun ikus liu-hosi votasaun.
Iha votasaun ne’e, deputadu na’in 43 vota a favór ba pedidu levantamentu ne’e ho karáter urjénsia.
"Rezultadu votasaun a favór 43, kontra 16 no abstensaun ida. Nune'e, proposta Lei ida ne'e tenke trata duni ho urjénsia no la'o tuir kalendáriu ne'ebé komisaun C prepara tiha ona", Aniceto anunsia liuhusi plenária, segunda (15/06).
Tanba ne'e, proposta refere baixa kedan ba komisaun C, no tuir oráriu aban sei halo audiénsia públika ho entidade sira.