“Tanba Timor ne’e rai  lulik, entaun seidauk rejistu ema mate. Maibé, kuandu abuza, ita sei arrepende. Ha’u husu ba komunidade, kuandu ema oin foun tama, informa ba seguransa hodi lori ba kuarentena, kuarentena mós la'ós kadeia, maibé atu prevene moras nia da'et ba ema seluk”, Lere apela, hafoin enkontru semanál ho Prezidente Reúblika, Francisco Guterres Lú Olo, iha palásiu Aitarak Laran, Dili.

Jenerál nia apelu ne’e, tanba haree ba dadus ne'ebé Sentru Integradu Jestaun Krize (SIJK) fó sai katak, sidadaun sira kontinua tama ilegalmente iha teritóriu nasionál, maski Timor-Leste aplika hela situasaun emerjénsia.

Lider másimu forsa armada ne’e rekoñese katak, seguransa sira iha fronteira liuliu membru F-FDTL ne’ebé destakadu iha fronteira Terrestre, hasoru difikuldade kona-ba fasilidade, no mos distánsia ka área fronteira ne’ebé luan tebes. 

Tanba ne’e nia husu ba komunidade sira iha fronteira atu inform aba parte seguransa bainhira hetan ema ruma movimentu ka tama illegal liuhusi fronteira. 

"Ha'u apela ba ita nia komunidade liu-liu iha fonteira katak, tenke koopera ho Polísia no F-FDTL, tanba moras ne'e mai la'ós da'et de'it ba ema ida, maibé primeiru mai ne'e da'et ba familia, depois husi familia ba ema seluk," nia alerta.