Embaixadora EUA iha Timor Leste Kathleen M. Fitzpatrick hasoru malu ho PR Lú Olo hodi esplika kona-ba apoiu ne'ebé Estadus Unidus America oferese ba TL.
"Iha oportunidade ne'e ha'u esplika ba eselénsia PR kona-ba apoiu EUA nian ba Timor-Leste iha situasaun surtu Covid-19, ne'ebé EUA apoiu ba TL ho tokon $1.6," informa Embaixadora Kathleen ba jornalista sira iha Palásiu Prezidensiál Bairu-pite Dili, Kuarta (10/06).
Embaixadora esplika, apoiu ne’ebé EUA oferese ba projetu oioin hanesan saúde, mascara, estabelese estasaun fase liman, dezinfektante no seluk tan.
PR Lú Olo, nia dehan, hato’o agradesimentu tanba hetan apoiu.
"Sua eselénsia agradese ba apoiu ne'ebé EUA fó iha periodu Covid-19 nian," dehan Kathleen.
Molok ne’e, EUA apoiu uluk ona materia no fasilidade prevensaun Covid-19 nian ba Sentru Integradu Jestaun Krize (SIJK), inklui formasaun atu konverte dezinfentan konsentradu ho seguru atu sai fali liquida limpeza nian litru liu 750,000.
Entretantu, aliened apoiu tokon $1.6 ba governu TL ba luta hasoru Covid-19, EUA investe ona besik millaun $70 ba asistensia saúde no durante tinan 20 nia laran EUA apoiu ona liu millaun $542 ba TL.