Istoria ne'ebé komiku uitoan mosu bainhira Vise PM hato'o deklarasaun. Armanda loke ninia diskursu ho fó bondia ba komunidade sira.
Bainhira rona komunidade uitoan de'it mak hatan, Xefe Suku ne'e halo kedan intervensaun.
"Uitoan de'it mak fó bomdia. Hotu-hotu hatan ka. Bomdia ho basa liman no hamnasa," dehan Xefe Suku Komoro, Tersa (09/06).
Hafoin ida ne'e, komunidade sira mós hahú basa liman no Vise PM mós kontinua ninia diskursu.
"Ha'u kontente atu mai iha ita-boot sira-nia leet, tanba buat ne'ebé durante iha estadu emerjensia ne'ebé kleur tebes ba imi-nia direitu, maibe fó sai ona iha media sira katak subsidiu dolar $100 sei to'o ba ita-boot sira no pagamentu subsidiu ne'e la'os iha Dili de'it, maibé iha munisipiu hotu-hotu ne'ebé hahú ohin imi bele hetan ona dollar $200 ba fulan rua nian," dehan Armanda.
Hafoin ministra ne'e hakotu nia diskursu, Xefe Suku mós husu ba komunidade sira ne'ebé naran laiha lista atu halo reklamasaun.
"Karik iha problema ruma Ministériu Solidariedade Sosial no Inkluzaun (MSSI) no Ministériu Administrasaun Estatal (MAE) sei toma responsabilidade ba imi-nia reklamasaun, maibé importante liu mak ida ne'ebé iha direitu atu simu, entaun simu buat ne'ebé durante ne'e promete," nia dehan.
