Xefe Suku Komoro, Eurico de Jesus da Costa hatete, iha lista husi Ministériu Solidariedade Sosial no Inkluzaun (MSSI) ne'ebé  fó ba suku, identifika uma-kain 6 mak kada fulan simu salariu liu $500.

Parte suku, Eurico dehan, halo ona aprosimasaun ho uma-kain 6 ne'e no sira sei kontinua simu, maibé osan refere sei aloka fali ba asaun sosial.

"Prontu, iha suku Komoro ne'e na'in neen mak ita deteta (kada fulan simu salariu liu $500), maibé ami halo ona aprosimasaun ho sira katak, sira bele simu maibé halo fali asaun sosial, tanba osan ne'e sira-nia direitu, maibé diahlikan, par osan ne'e ba fali asaun soliedariedade ba sira nia maluk sira, konforme sira hatete mai ami," dehan xefe suku Eurico iha nia knar fatin, Tersa (09/06).

Nia hatutan, uma-kain balun ho salariu liu $500 kada fulan ne'e balun serbisu iha Organizasaun Naun-Governamental, asesor, polisia, no F-FDTL.

Entretantu, uma-kain balun iha Suku Komoro nia naran la sai iha lista benefisiariu, ho nune'e parte suku husu ba sira atu halo reklamasaun.