Koordenadór Ekipa Akompañamentu Promosaun Funsionáriu Públiku, Diresaun Jeral EDTL, Kassios Klei Ximenes hateten, antes atu to’o iha ne’ebá tenke iha mekanizmu ida. Tanba tenke iha polítika públiku ruma ne’ebé ko’alia kona-ba estatutu EDTL nian to’o tama ba iha Empreza Públika.

"Ami lakohi esperiensia ne’ebé akontese ba kolega sira iha RTTL.ep ne’e akontese mai ba EDTL”, dehan nia, iha Parlamentu Nasional, Kinta (28/2).

Nune'e husu ba Governu bainhira atu halo mudansa ba EDTL presiza fo kondisaun ka opsaun ruma ba funsionáriu sira para sé mak hakarak ba funsionáriu públiku no empreza públiku, nune’e bele iha justisa ba funsionariu sira.

Entretantu, Prezidente Parlamentu Nasional, Arão Noé de Jesus Amaral hateten, problema ne’ebé EDTL enfrenta ne'e sei hato’o ba Governu hodi haree ba problema sira ne’e.

“Ne’e kompetensia Governu nian, ne’ebé depois Parlamentu rekomenda ba Governu para atu haree ba asuntu sira ne’e”, tenik nia.