Print this page

9 Juñu, Governu Hahú Pagamentu $200 Kada Uma-kain

Vise PM ho Ministra Solidaridade Social no Inkluzaun, Armanda Berta halo Konferensia imprensa konjunta ho membru governu seluk inklui parte sira ne'ebe iha relasaun ho selu subsidiu, iha MSSI Kaikoli (3/6) Vise PM ho Ministra Solidaridade Social no Inkluzaun, Armanda Berta halo Konferensia imprensa konjunta ho membru governu seluk inklui parte sira ne'ebe iha relasaun ho selu subsidiu, iha MSSI Kaikoli (3/6) Foto Isac Oliviera

Tempotimor (Dili)-Ministériu Solidariedade Sosial no Inkluzaun (MSSI) ofisialmente públika kalendáriu pagamentu subsidiu $100 ba kada uma-kain iha Timor laran tomak.

Tuir kalendariu ne’e, prosesu pagamentu ba subsidiu sei hahú iha Tersa (09/06).

Vise Primeira Ministra Armanda Berta informa, hahú 9 Juñu kada uma-kain sei simu subsidiu ho valor $200 ba fulan rua nian.

"Hahú iha Tersa-teira (09/06), sei realiza pagamentu iha suku sira tuir kalendáriu, tanba ne'e husu ba xefe uma-ka'in sira atu marka prezensa iha sede suku tuir kalendáriu no oras, inklui kumpre mós regras Organizasaun Mundiál ba Saúde (OMS) hanesan distansiamentu sosiál no fíziku," dehan Armanda iha edifísiu MSSI Kaikoli, Kuarta (03/06).

Tuir dadus, Vise PM ne’e dehan, uma-ka'in hamutuk 298.119 mak sei hetan subsídiu.

"Apoiu umanitáriu ida ne'e sei benefísia ba uma-ka'in hamutuk rihun 318.527, maibé, ita responde dadaun ba munisípiu 12, uma-ka'in hamutuk rihun 298.119, la inklui RAEOA, tanba parte finansas sei halo transferénsia ba konta bankária RAEOA ninain, tanba ne'e MSSI responde dadaun ba munisípiu 12," dehan nia.

Nia esplika. apoiu umanitáriu ne'ebé governu fó ba uma-ka'in sira hamutuk $200 ba fulan rua nian.

"Apoiu ida ne'e ba fulan rua nian, hamutuk $200 durante periodu estadu emerjénsia iha fulan rua nia laran," nia dehan.

Iha fatin hanesan, Ministru Administrasaun Estatál (MAE) Miguel Pereira de Carvalho informa, totál uma-ka'in ne'ebé hetan apoiu umanitáriu ne'e dadus husi nivél munisípiu sira.

"Ministériu ida ne'e servisu hamutuk ho entidade hotu husi aldeia to'o munisípiu. Dadus ne'e husi munisipál no administrasaun munisípiu nian inklui RAEOA ne'ebé halo ona verifikasaun katak iha uma-ka'in hamutuk rihun 318.257, mak iha direitu hodi hetan umanitáriu iha periodu pandemia Covid-19," dehan ministru ne’e.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com