Fidelis hato’o kestaun ne’e hafoin hala’o enkontru ho parseiru dezenvolvimentu sira Multilateral, Nasaun Unidadus, reprezentante Banku Mundial iha Timor-Leste no Organizasaun Nasoins Unidus ba Dezenvolvimentu (UNDP).
"Parseiru dezenvolvimentu sira lakohi hamrik iha ninin de'it maibé hakarak atu envolve direita liu husi mekanismu komunikasaun no kordenasaun ida ne'ebé di’ak liu tan ho governu Timor-Leste, no sira mós prontu atu disponibiliza sira-nia rekursu tantu ema tekniku sira no rekursu seluk, sira prontu par atu apoiu ita-nia governu atu bele mobiliza rekursu iha rai laran no rekursu sira ne'ebé disponivel iha rai li’ur i rekursu sira husi nasaun sira seluk atu bele ajuda ita-nia governu hodi bele la'o ba oin, implementa prioridade sira ba dezenvolvimentu nian," dehan Fidelis.
Molok hala’o enkontru ho parseiru sira, Fidelis hatete, nia parte halo uluk enkontru ho Primeiru Ministru Taur Matan Ruak hodi simu orientasaun.
"Ohin Primeiru lugar rona vizaun politika no orientasaun politika kona-ba prioridade dezenvolvimentu Timor-Leste nian husi Primeiru Ministru no bele loke dalan ba oin atu nune'e mandatu oitavo governu ida ne'e bele halo konsentrasaun di’ak liu tan ba iha prioridade sira dezenvolvimentu ita nian katak, ita mós bele kapitaliza apoiu husi parseiru dezenvolvimentu sira."