Desizaun bankada CNRT hamutuk ho nia aliadu UDT/FM no PUDD hodi la partisipa iha kualker atividade PN tanba sei hein desizaun husi Tribunal Rekursu (TR).

Ikus mai TR foti desizaun hodi indefere pedidu ne’ebé CNRT hato’o. Maske la simu ho desizaun TR ne’e, maibé bankada CNRT deside hodi tuir plenaria PN.

"Bankada CNRT tuir loloos sei la tuir plenária ida ne’e hodi hein desizaun ba rekursu ikus liu ne’ebé Bankada submete ona ba Tribunal Rekursu iha loron 29 Maiu 2020,” deklara deputadu CNRT Gabriel Alves iha plenaria PN, Tersa (02/06).

Nia dehan, CNRT kontinua fó konfiansa ba TR nu’udar orgaun as liu atu foti desizaun, no CNRT deside hodi luta iha plenaria PN.

“CNRT kontinua depozita konfiansa ba Tribunal hanesan orgaun as liu atu foti desizaun, maske Tribunal hatudu ona atu lakohi foti papél tuir nia kompeténsia atu hakotu disputa legál ba implementasaun Konstituisaun Repúblika Demokrátika Timor-Leste no lei oan sira. Tanba ne’e CNRT tenke foti papél atu mai luta iha plenária ida ne’e," dehan Gabriel.

Deputadu ne’e afirma, CNRT ho fuan boot luta iha plenária PN, tanba Tribunal Rekursu la halo knaar ho loloos.

"Partidu CNRT ho fuan boot simu no respeita nafatin desizaun tribunal nian tuir konstituisaun haruka katak, tribunal nia desizaun mak aas liu iha pais de direitu demokratiku mezmu ke desizaun Tribunal nian ne’e lamentável tebes, tanba Tribunal tenta atu hases aan hodi deside materia de faktu no apenas deside indeferimentu liminár."

Deputadu CNRT ne’e dehan, bankada CNRT iha PN afirma pozisaun firme hodi luta kontra see de’it mak ignora no lakohi kumpre K-RDTL.

"Ami sei halo esforsu tomak hodi harii hikas sosiedade demokrátika, sosiedade ida ne’ebé halo tuir de’it mak konstituisaun no lei sira, sosiedade ida ne’ebé iha esperansa ba knaar justisa nian, no sosiedade ida ne’ebé mak orgullu nu'udar povu RDTL," nia dehan.