"Maske PR no PM fahe preokupasaun hanesan maibé implementasaun desizaun ne’ebé fó impaktu diretu ba povu nia moris sai dezafiu boot ida ba governu," dehan PR Lú-Olo liuhusi pers release ne'ebé tempotimor.com asesu liuhusi pájina gabinete PR, Sesta (29/05)
Maske servisu todan ba governu, maibe PR fiar ba kompromisu PM no apela ba membru governu ne’ebé foin simu posse atu hala’o knaar foun ho laran tomak.
"PR hein katak governu bele halais rekuperasaun ekonómiku atu hadi’ak povu nia moris ne’ebe sei iha susar nia laran, tanba povu maioria sei moris iha susar laran tanba produtu internu brutu no falta empregu," Lú-Olo subliña
Xefe estadu mós husu governu atu hili modelu dezenbolvimentu ekonómiku ne’ebe foka ba ninia ema.
"Povu nia hakarak atu hetan moris di’ak boot tebes tanba ne’e PR husu ukun-na’in sira hametin liután unidade nasionál. Tanba povu hakarak unidade nasionál no ukun ida ne’ebé halais dezenvolvimentu nasionál la’o lalais no fo rezutadu di’ak," nia dehan
Aman ba nasaun mós husu PM atu konta mós apoiu husi xefe estadu nian.
"PR hateten katak governu no PM bele konta mós apoiu husi xefe estadu no apela atu kontinua servisu hamutuk no respeita malu atu bele hakat liután ba oin," PR afirma
Alende ne'e xefe estadu mós dehan, durante iha funu aprende oinsa rona malu no haraik aan.
“Hanesan mós señor PM, ha’u mós luta iha ai-laran durante tinan 24 no husi luta ne’e ami aprende lisaun murak barak. Lisaun ida ne’ebe ami aprende mak iha tempu susar nia laran, hanesan ho ida ne'ebe mundu no Timor-Leste hasoru daudaun, ita presiza haraik-an, respeita malu no servisu hamutuk. Bainhira hatene rona no hatene haketak saida mak importante husi saida mak ladún importante, ita bele tau sees buat sira ne’ebé haketak ita no hanesan ne’e de’it mak ita fo liman ba malu no hamutuk ita bele la’o to’o ne’ebe de’it,” PR Lú-Olo hateten.
Husi istória simples ne'e PR enkoraja membru governu foun katak, iha servisu hotu tenke haraik aan.
"PR enkoraja atu ukun-na’in sira hatene serbisu hamutuk, haraik-an no hatene respeita malu no rona malu nu’udar dalan atu ultrapasa susar no bele sai forte liután," PR enkoraja
PR mós fiar katak ema hotu-hotu hakarak unidade atu bele hasoru dezafiu bobot sira, la’ós de’it dezafiu estadu no governu nian maibe nasaun tomak ninian.
