PR Lu Olo dehan, maske nia laran todan atu dekreta EE datoluk ne’e, maibé nu’udar Xefe Estadu nia tenke halo duni atu bele salva povu Timor-Leste husi ameasa Corona Virrus Deasses 2019 (Covid-19).

"La'ós ho laran kaman ha'u renova estadu emerjénsia ba dala ida tan. Maibé, ita presiza foti duni médida sira ne’e atu evita moras Covid-19 tama dala ida tan no maka’as liu tán iha Timor-Leste, to’o pontu ida ne’ebé ita bele lakon kontrolu no lakon ita-nia rikusoin boot liu mak ita-niia ema," dehan PR Lu Olo bainhira deklara estensaun EE datoluk iha Palásiu Prezidensiál Bairu-pite, Kinta (28/05).

PR Lu Olo hatete, salva povu nia vida mak hotu-hotu nia hakarak, no direitu ba vida tama mós iha lista direitu husi Konstituisaun RDTL.

Lu Olo dehan, bainhira ema seidauk hatene oinsá halakon Covid-19 iha mundu ka siéntista sira seidauk deskobre vasina atu hasees umanidade husi moras Covid-19, ema hotu-hotu iha mundu sei hasoru risku hetan moras no mate tanba Covid-19.

"Salva povu nia vida mak ha’u-nia prioridade dahuluk nu’udar prezidente hotu-hotu nian no ba ema hotu. Tanba ne’e mak ha’u renova dala ida tan estadu emerjénsia," Lu Olo deklara.

Xefe Estadu mós husu ba lider politiku sira, organizasaun no sidadaun Timor-Leste hotu-hotu atu komprende tanba sa mak deside estensaun EE no husu mós atu hotu-hotu beIe simu ho laran ksolok no hakmatek.

Tuir Lu Olo, ho de’it deklarasaun estadu emerjénsia husi PR ne’ebé bazeia ba artigu 25 K-RDTL mak bele suspende ka Iimite direitus, liberdades no garantias ne’ebé konstituisaun fó ba sidadaun sira.

“Nune’e, deklarasaun renova EE daruak nia objetivu boot liu mak hasees risku hetan moras foun ne'e ka hetan korona virus ne’ebé identifika ona nu’udar kauza ba moras Covid-19,” deklara nia.

VIDEO PUBLISIDADE APELU HUSI PM TAUR APLAUS BA FRONT LINE