Posibilidade PD 'Divorsiu Ona' Husi AMP Foun Featured

Tempotimor (Dili)-Relasiona ho dinámika polítika ne'ebé la'o iha rai laran, Partidu Demokrátiku (PD) hola pozisaun hodi fó apoiu ba kualker governu ne'ebé iha. Antes ne'e partidu Kmanek Haburas Unidade Nasionál Timor Oan (Khunto) fila kotuk uluk ona husi Aliansa Maioria Parlamentár (AMP) no Tribunal Rekursu (TR) nia desizaun deklara AMP foun la prienxe ona rekezitus maiória, nune'e PD mos hola pozisaun hodi apoiu kualker governu, hodi aselera servisu ba povu hodi harahun tiha AMP ne'ebe lidera husi CNRT.

"Koligasaun entre partidu polítiku ne'ebé PD hola parte nu'udar meiu ida atu viaviliza governu ida hodi prienxe kritéria konstituisionál artigu 106, hodi forma maiória parlamentár. Ho razaun ida ne'e mak liuhusi konferénsia nasionál ne'ebé halo iha loron 20 fulan fevereiru 2020 PD deside hodi hola parte iha koligasaun entre partidu CNRT, Khunto, PD, UDT/FM no PUDD," dehan iha karta ofesiál ne'ebé PD haruka ba Prezidente partidu CNRT Kayrala Xanana Gusmão, kona-ba pozisaun PD nian, ne'ebé hetan asina husi Prezidente PD Mariano Assanami Sabino, Kuarta (27/05)

Iha karta ne'e dehan maske koligasaun ne'e hetan Maiória parlamentár, maibé iha loron 29 abril 2020, Khunto deklara sai husi koligasaun ho razaun atu mantein apoiu governu daualu no iha loron 19 maiu, Tribunal Rekursu hasai desizaun kona-ba retirada Khunto husi koligasaun foun husi parte neen hodi dehan, AMP foun la prienxe ona maiória parlamentár hodi forma governu konstituisionál dasia.

PD afirma, bazeia ba desizaun P-KHUNTO no TR nian mak halo mudansa ba konjuntura polítika hodi afeta ba ezisténsia koligasaun foun nian.

"Maske iha mudansa konjuntura polítika, maibé PD kaer metin nia prinsípiu katak PD ba estadu. Nune'e, PD hakarak kontribui nafatin ba konstrusaun estadu no estadu liuhusi dalan pasífiku hodi garante nafatin unidade, paz, demokrasia no estabilidade iha TL," dehan PD liuhusi karta ofesiál kona-ba pozisaun PD nian.

Ho deklarasaun ne'ebé iha, maka PD deside hodi apoiu kualker governu.

"Tanba iha ona konjuntura polítika ida ne'e, maka PD sei fó apoiu ba kualker governu ne'ebé forma husi maiória parlamentár, nune'e bele aselera dezenvolvimentu nasionál, konstrusaun estadu no nasaun," PD subliña

Entretantu karta ne'ebé tempotimor.com asesu, hetan asina husi Prezidente partidu PD Mariano Assanami Sabino ho numeru referénsia 28/V/PD/2020.

 

VIDEO PUBLISIDADE APELU HUSI PM TAUR APLAUS BA FRONT LINE

 

Rate this item
(1 Vote)
Last modified on Tuesday, 02 June 2020 15:07
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.