PN Autoriza PR Estensaun EE Ba Periodu Datolu

Tempotimor (Dili)-Parlamentu Nasionál (PN) fó ona autorizasaun ba Prezidente Repúblika (PR) Francisco Guterres Lú-Olo atu halo deklarasaun no dekreta ba renovasaun estadu emerjénsia ba periodu datolu ne'ebé PN fó ona autorizasaun ho votus a favór 40.

Iha debate ba estensaun estadu emerjénsia ne'ebé la'o durante loron ida iha plenária PN, mak Primeiru Ministru (PM) Taur Matan Ruak katak, estensaun EE ba periodu datolu, sei fó liberdade ba movimentasaun rai laran.

"Médida implementasaun estadu emerjénsia ba dala rua, iha primeira faze ne’e ami maka’as uitoan, iha segundu faze ne’e relaixa, uza prinsipiu proporsionalidade ho proversibilidade i terseiru faze ne’e ami relaixa liu tan, pur-ezemplu, misa sira bele kontinua, eskola sira haree posibilidade, dezde ke tuir regra sira hotu ne’ebé iha, atividades ekonomikus bele la’o fila fali," dehan PM Taur iha plenária PN, Kuarta (27/05)

Haree ba deklarasaun xefe governu nian ne'e mak deputadu sira iha PN maiória apoiu hodi kontinua estensaun estadu emerjénsia ba loron tolunulu tan.

Iha autorizasaun ba dekretu governu nian ne'e hetan aprovasaun ho votu a favór 40 kontra 1, abstensaun zero no auzente hamutuk 24.

Iha aprovasaun ne'e Prezidente Parlamentu Nasionál (PPN) Aniceto Longunhos Guterres lori PN nia naran tatoli liafuan ba xefe governu atu ezekuta servisu tuir regras.

"Nu'udar PPN hakarak hato'o hela lian tatoli ba señor PM no membru governu tomak katak, atu implementa didi'ak, no liafuan xave ne'ebé ita atu kaer mak salva ema nia vida, maibé mós tenke evita ema mate tanba hamlaha," dehan PPN Aniceto

Entretantu iha dekretu governu nian ba estensaun estadu emerjénsia ne'e hamutuk artigu 10, no artigu ne'e halo mudansa mak artigu 3 no artigu 4 ne'ebé antes ne'e limita direitu sidadaun sira nian ba sirkularasaun iha rai laran, maibé iha estensaun EE ba periodu datolu fó liberdade ba direitu sidadaun nian ba sirkulasaun iha rai laran.

 

VIDEO PUBLISIDADE APELU HUSI PM TAUR APLAUS BA FRONT LINE

 

Rate this item
(0 votes)
Last modified on Wednesday, 27 May 2020 21:48
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.