Print this page

Luis: Deputadu Falta Loron 5, RPN Fó Dalan Hodi Investiga

Tempotimor (Díli)- Relasiona ho bankada CNRT ho nia aliadu sira la marka prezensa iha plenária Parlamentu Nasionál (PN) mak Segundu-vise-prezidente PN, deputadu Luis Roberto hatete, bainhira deputadu ida falta loron lima, iha plenária no komisoens, mak rejimentu PN fó dalan hodi investiga pesoál deputadu refere.

"Médida ne'ebé atu hola ba bankada ka deputadu sira ne'ebé la tama ka falta iha plenária no komisaun sira mak fila-fali ba rejimentu PN artigu 10," dehan Vise-PPN deputadu Luis Roberto, iha PN ba jornalista, Tersa (26/05).

Nia mós dehan, matadalan ba Órgaun daruak iha Timor-Leste Leste hanesan PN mak rejimentu PN nian.

"Rejimentu PN mak matadalan ba Órgaun Estadu daruak ida ne'e, ne'ebé bainhira deputadu ida mak la halo ninia knaar durante loron lima tutuir malu, mak bazeia ba rejimentu PN artigu 10 ne'ebé hakerek momos katak sei fó xamada atensaun ba pesoál deputadu ka deputada ne'ebé la halo knaar durante loron 5 tutuir malu, hodi husu tanba saida falta," dehan Deputadu Luis.

Nia mós afirma katak, bainhira laiha justifikasaun mak sei halo prosesu ba pesoál deputadu no deputada refere.

"Prosesu bazeia ba administrasaun mós halo, prosesu ba dalan legál mós halo, tanba rejimentu PN la halai katak husi PN, ne'ebé ita hotu-hotu presiza hala'o ita nia knaar no valoriza povu nia votus, tanba ne'e mak ko'alia polítika, entaun mai iha plenária, tanba plenária mak aas liu," nia tenik.

Entretantu iha artigu 10 rejimentu PN husi alinea A to'o D obrigatoriamente deputadu ka deputada sira tenke ezerse sira nia funsaun hodi hola parte ka partisipa iha servisu hotu iha PN, hanesan sesaun plenária reuniaun komisoens, partisipa iha votasaun, asina lista prezensa.

Ho nune'e, husi pontu hirak ne'e mak pesoál deputadu ida la marka prezensa ka falta loron lima tutuir malu, mak iha alinea E fó biban ba deputadu ka deputada refere atu fó justifikasaun.

Entretantu tuir observasaun tempotimor.com nian iha tereñu nota katak, deputadu sira ne'ebé la partisipa iha plenária hahu husi horseik to'o ohin nian, mak deputadu sira husi bankada CNRT, UDT/FM no PUDD.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com