PN Adi'a Destituisaun Ba Meza Sekretária 

Tempotimor (Dili)-Relasiona ho polítika bankada Parlamentár Fretilin-PLP no Khunto ne'ebé iha ona konsensu atu halo mudansa ka destitui ba sekretária no vise sekretária meza PN, ne'ebé ohin iha ona ajenda atu halo destituisaun, maibé Prezidente Parlamentu Nasionál (PPN) Aniceto Longunhos Guterres seidauk simu rekerimentu husi bankada parlamentár tolu refere.

Tuir xefe bankada parlamentár Fretilin deputadu Francisco Miranda Branco rekoñese katak, seidauk aprezenta duni naran sira ne'ebé atu asume kargu nu'udar sekretária no vise sekretária ba meza PN.

"Sim, tuir loloos, ohin ita avansa ona ba halo destituisaun ba kargu sekretária no vise sekretária meza Parlamentu Nasionál (PN) maibé tanba iha lapsu oituan, lapsu iha kandidatu sira nian naran, entaun ohin dadersan mak kompleta lista ne'e, entaun ita bele adi'a ka halo plenária extraordináriu ida para rezolve tiha situasaun nee hodi kompleta meza PN," dehan Xefe bankada Fretilin deputadu Francisco Miranda Branco iha plenária PN, Tersa (26/05).

Iha fatin hanesan deputada Olinda Guterres husi bankada Khunto mos rekoñese katak, seidauk halo destituisaun ba sekretária meza PN tanba iha lapsu.

"Loos duni iha lapsu oituan, horseik ami hatama duni naran, maibé horseik, hanesan baibain ami hatete katak, ami úniku komandu, tanba ne'e mak horseik lokraik ha'u ba konsulta fali ho Konselleru Másimu partidu Khunto José dos Santos 'Naimori Bucar', entaun nai konselleru hatudu ami na'in haat ne'e ida hodi ba asume kargu iha vise sekretáriu meza PN," dehan Olinda.

Relasiona ho deklarasaun ne'e mak Prezidente Parlamentu Nasionál (PPN) Aniceto Longunhos Guterres Lopes foti konkluzaun katak, retira ajenda refere husi sesaun plenária loron ohin nian.

"Se hanesan ne'e ita aprova hodi hasai ajende númeru tolu ne'e, entaun hela ajenda rua de'it mak hanesan periodu ordem do dia, no ajenda daruak mak aprezentasaun relatóriu anuál husi Komisaun Anti Korupsaun (KAK) tinan 2019 nian," dehan PPN Aniceto.

Entretantu ajenda ne'ebé tempotimor.com asesu ba plenária loron ohin nian ba destituisaun sekretária no vise sekretária meza PN hodi halo votasaun ba sekretária no vise sekretária foun ne'e tau iha ajenda ikus liu husi sesaun plenária loron ohin nian.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.