Asaun ne’e Xanana halo hafoin partidu CNRT realiza konferensia imprensa iha sede partidu hodi kritika desizaun Tribunal Rekursu (TR) ba petisaun husi CNRT hasoru Prezidente Repúblika Francisco Guterres Lu Olo no keixa husi Prezidente Parlamentu Nasionál sesante Arão Noe hasoru bankada FRETILIN, PLP no KHUNTO ne’ebé realiza plenaria ba destituisaun meza PN.

Xanana iha ninia deklarasaun kritika desizaun TR no konsidera desizaun ida ne’ebé TR fó sai halo nia la fiar ona lei iha TL.

“Ita la fiar tiha lei, laos la fiar juiz sira, tanba sira mesak matenek, mais ita mak la fiar tiha ona lei, tanba afinal lei sira ne’e hakerek hela de’it, mais la valee,” deklara Xanana liu husi konferensia imprensa iha sede partidu CNRT, Bairo dos Grilhos, Sabadu (23/05).

Hafoin deklara la fiar ona lei, Xanana halo asaun hodi fahe K-RDTL ba komunidade sira.

Tuir video badak ho durasaun menutu 1:26 ne’ebé públika iha pajina facebook “Timor Leste iha Mundu” iha Domingu (24/05), tuku 23:33 Otl, Xanana hamriik entre ema lubuk nia leet hodi fahe livru ho kapa bandeira RDTL.

Tuir caption iha video ne’e katak “Kay Rala Xanana Gusmão, fahe Konstituisaun RDTL”.

Iha video ne’e, Xanana ne’ebé hamriik besik karreta mutin ida hasai livru husi kaixa ne’ebé kaer husi nia eskoltu.

Laiha esplikasaun klaru liu tan kona-ba Xanana halo asaun ne’e iha fatin ne’ebé.

Haree ba asaun Xanana ne’e, utulizadór facebook balun konsidera asaun ne’e “tarde” ona, maibé iha balun mós fó apoiu.

Utulizadór facebook ida, Herminia Gama dehan, “Uluk tinan 10 ba kotuk ukun ne’e lakohi fahe, agora mak foin fahe ne’e, ami estuda mós ami mak povu ne’e nafatin povu, boot hada’u-malu poder hodi baku rahun povu nia sasan iha uma fukun”.

Utulizadór facebook seluk, Jery Silva ne’ebé apoiu asaun ne’e dehan, “Par povu mós bele iha koñesimentu kona-ba ita-nia K-RDTL i bele analiza i estuda no hodi akompaña desizaun sauda de’it mak TR ou ita-nia justisa iha ita-nia rai ne’e, halo tuir K-RDTL ka lae? Tanba agora ita haree buat barak mak halo la tuir K-RDTL i ne’e susar boot ba ita-nia rai no jerasaun foun sira iha futuru mai. Mai ita hotu apoiu hodi defende K-RDTL. Viva Grande Lider Kay Rala Xanana Gusmão.”

VIDEO PUBLISIDADE APELU HUSI PM TAUR APLAUS BA FRONT LINE