Hanesan públiku hatene, iha 23 Maiu 2020, Prezidente CNRT Kay Rala Xanana Gusmão fó ona orden direitamente ba MG husi CNRT atu tenke sai husi governu daualu.

Ho orientasaun ida ne’e, ohin dader, Sekretariu Estadu Kooperativa (SEKooP) Arsenio Pereira ne’ebé reprezenta CNRT iha governu, hakat ona ba palasiu governu hodi hasoru-malu ho PM Taur.

"Ohin hasoru duni, mais PM dehan reuniaun Konsellu Ministru hotu lai mak ami hasoru fali, ne'ebé agora reuniaun KM, ne'ebé la jadi hasoru," dehan Arsenio iha Palásiu Governu.

Kona-ba orden husi Xanana, Arsenio dehan, MG CNRT tenke kumpre duni desizaun ne’ebé partidu foti ona.

"Klaru katak desizaun partidu nian ita tenke kumpre, ne'ebé foin lalais Sábadu mak halo deklarasaun ida ne'e, ami mai iha ne'e kan partidu mak haruka mai, klaru katak partidu mak haruka mai, partidu haruka para, ami tenke para," dehan Arsenio.

Entretantu, membru CNRT ne’ebé durante ne’e hala’o knar iha governu mak hanesan: Hermenegildo Pereira asume kargu Ministru Prezidénsia Konsellu Ministru (MPKM); Dionísio Babo Soares asume kargu Ministru Negósiu Estranjéiru no Kooperasaun (MNEK); Sara Lobo Brites asume kargu Vise Ministra Finansas; Dulce de Jesus Soares asume kargu Ministra Edukasaun, Juventude no Desportu (MEJD); José Abilio Caetano asume kargu Vise Ministru Administrasaun Estatal; Arsenio Pereira asume kargu Sekretáriu Estadu Kooperativa (SEKooP); Teofilho Caldas asume kargu Sekretáriu Estadu Arte no Kultura (SEAK); Nelio Isaac Sarmento asume kargu Sekretáriu Estadu Juventude; Alexandrinho Xavier Araujo asume kargu Sekretáriu Estadu Protesaun Sivíl (SEPS); no Gil da Costa "Oan Soru" asume kargu Sekretáriu Estadu ba Asuntu Kombatentes Libertasaun Nasionál (SEAKLN).

VIDEO PUBLISIDADE APELU HUSI PM TAUR APLAUS BA FRONT LINE