Deklarasaun ne’e parte CNRT hato’o relasiona ho rumoris balun ne’ebé hatete katak, CNRT sei mobiliza massa hodi halo manifestasaun no sei hatama mós ema estranjeiru pozitivu Covid-19 mai TL.

Adjuntu Sekretariu Jeral CNRT dahuluk Jacinto Rigoberto dehan, rumoris ne’ebé hatete katak iha 28 Maiu CNRT sei mobilza massa hodi halo manifestasaun hasoru Parlamentu Nasionál no Prezidente Repúblika.

"Hatán ba rumor sira ne'e mak partidu CNRT nu'udar partidu ida ne'ebé hatúr ho prinsípiu no regras, hakruk ba konstituisaun no leis, tane as valores  demokrásia nian, ezerse toleránsia no étika, hodi servi povu no nasaun, entaun afirma katak rumor sira ne falsu, la loos, laiha fundamentu," dehan Jacinto iha sede partidu CNRT Bairu dos Grilhos, Sábadu (23/05).

Nia rezeita mós informasaun ne’ebé hatete katak , CNRT sei lori tama ema estranjeiru infetadu Covid-19  mai Timor-Leste, tanba CNRT iha inistiva hodi envolve maka'as hodi luta kontra surtu Covid-19.

"CNRT envolve an maka'as kedas dezde inísiu pandemia Covid-19 tama mai TL, liu husi nia prezidente (Xanana) rasik ne'ebé ho vontade pesoál no dedikasaun tomak ajuda inisiativas governu nian atu bele fó resposta imediata ba nesesidade, hanesan fatin ba karantina no izolamentu iha Vera Kruz, no mós konsege husu apoiu ka doasaun  ekipamentus husi governu Xina atu responde ba fasilidade ne'ebé TL presiza hodi kombate Covid-19,"  Jacinto esklarese.

Jacinto dehan, CNRT hein instituisaun kompetente sira atu bele halo avaliasaun konkreta, no objetiva kona-ba situasaun Covid-19 nian ho nia impaktu ba mobilizasaun ekonómika povu nian iha tempu ida ne'e.

Nia afirma, Partidu CNRT deklara fó apoiu nafatin ba kontrola másimu iha servisu fronteira nian, kontinua apoiu mós ba servisu iha izolamentu karik iha, nomós makanizmu atu garante testes ne'ebé di'ak liu ba sidadaun ne'ebé, karik deteta iha sintomas Covid-19.

"CNRT fiar nafatin ba instituisoens kompetente estadu nian ba matéria seguransa no defesa atu bele buka tuir informasaun sira ne'ebé espalla iha komunidade nia leet, hodi hatene loloos autór ba rumor sira ne'e no hola médida tuir regras no leis ne'ebé vigora iha ita-nia nasaun Repúblika Demokrátika Timor-Leste."

VIDEO PUBLISIDADE APELU HUSI PM TAUR APLAUS BA FRONT LINE