Tuir Aniceto,  funsionamentu PN ne’e garantia husi maioria deputadu, no bazeia ba rejimentu PN deputadu mak tuir plenaria la’os bankada.

"Bankada CNRT ho nia aliadu la partisipa Parlamentu Nasionál funsiona nafatin. Se ita haree PD mós partisipa hela iha atividade sira ne'e, signifika iha deputadu 41, maiória ida iha PN ne'e garante funsionamentu normal," dehan Aniceto iha PN, Sesta (22/05).

"Plenária ne'e deputadu mak tuir, la'ós bankada mak tuir, ne'ebé deputadu la tuir ne'e kala falta no hotu-hotu tenke iha justifikasaun."

VIDEO PUBLISIDADE APELU HUSI PM TAUR APLAUS BA FRONT LINE

Molok ne’e, bankada sira ne'ebé hola parte iha Aliansa Maioria Parlamentár (AMP), la inklui bankada PD, foun ne'ebé lidera husi CNRT deklara katak sei la partisipa iha kualker atividade PN nian.

"Bankada CNRT, UDT/FM no PUDD sei la partisipa ba kualker atividades iha PN ne’ebé konvoka husi PPN illegál to’o desizaun husi Tribunal  Rekusrsu ne'ebé mak justu tuir konstituisaun no lei ne'ebé mak vinkula iha ita-nia rain," deklara vise Prezidente bankada CNRT Patrocino dos Reis Fernandes iha sala bankada CNRT, Kinta (21/05).

Bankada CNRT ho nia aliadu sira mós konsidera reuniaun lider bankada ne'ebé lidera husi PPN Aniceto ne'e ilegál.

"Ami konsidera konferénsia lider bankada no konvokasaun plenária iha dia 18 no 19 Maiu hodi troka atual PPN Arão Noé de Jesus da Costa Amaral nu'udar aktu ilegál tanba la tuir konstituisaun, leis no rejimentu PN nian," nia dehan.