Arão Entrega Ona Meza PPN Ba Aniceto Guterres

Eis Prezidente Parlamentu Nasional, Arão Noé de Jesus da Costa Amaral ko'alia ba jornalista sira iha Parlamentu Nasional Eis Prezidente Parlamentu Nasional, Arão Noé de Jesus da Costa Amaral ko'alia ba jornalista sira iha Parlamentu Nasional Foto Arkivu

Tempotimor (Dili)-Prezidente Parlamentu Nasionál (PPN) sesante Arão Noé de Jesus da Costa Amaral entrega ona kargu PPN ba Prezidente PN eleitu deputadu Aniceto Longunhos Guterres Lopes.

Tuir PPN sesante Arão Noé katak, nu'udar deputadu tenke kumpri desizaun ne'ebé la'o ona.

"Ha'u kumpri rezultadu votasaun iha tersa-feira (19/05), rezmu ami sei halo rekursu ba tribunal tuir regras legais ne'ebé iha, mais depois ita haree, entaun ha'u mai ona iha bankada, depois ita nhein desizaun husi tribunal nian kona-ba prosesu sira ne'e," dehan PPN sesante Arão Noé de Jesus da Costa Amaral iha salaun bankada CNRT, Kinta (21/05)

Arão mós lamenta ho situasaun ne'ebé la'o iha PN hodi hili PPN foun.

"Soké ha'u lamentavel oituan iha eleisaun ida ne'e, mezmu ema hili xefe da turma iha eskola mós sei formal no dignu, mais eleisaun PPN ida hanesan loos merkadu, ida ne'e mak realiza, ne'e mak ha'u hanoin lamentavel teb-tebes, mais prontu ita submete ba desizaun pois ita hein orgaun seluk nia kompeténsia," dehan Arão.

 

VIDEO PUBLISIDADE APELU HUSI PM TAUR APLAUS BA FRONT LINE

 

Nia mós dehan, knaar hanesan deputadu kontinua servisu.

"Knaar ha'u nia, knaar hanesan deputadu ne'e nafatin, la sei lakon, tanba hau mós eleitu direitu, maibé ba kestaun PPN nian ne'e mak kestaun seluk, mais kona-ba deputadu ha'u titulár nafatin, lor-loron ha'u mai servisu hanesan baibain," dehan deputadu CNRT ne'e.

Entretantu kona-ba legalidade ka lae, kona-ba PPN foun, Arão Noe lakohi fó komentáriu.

"Ida ne'e ha'u lakohi ko'alia kona-ba ida ne'e, ne'e so tribunal mak sei pronunsia, ne'ebé desizaun saida de'it mak sai mai ita hotu tenke submete, ida ne'e mak estadu direitu demokrátiku, ne'ebé desizaun saida mak sai mai ita hotu tenke simu," nia dehan

Deputadu ne'e mós afirma, kona-ba nia presepsau husi hela PPN ne'e laiha buat ida, tanba servisu hanesan baibain.

Entretantu observasaun tempotimor.com nian iha terenu katak portaun ne'ebé bai-bain PPN sesante Arão Noé de Jesus da Costa Amaral tama, xave metin no PPN sesante tama iha plenária ho kareta privadu nian ho xapa matrikula A. 15-938 no uza formas bai-bain.

Rate this item
(1 Vote)
Last modified on Thursday, 21 May 2020 11:31
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com