Hahi Heroi TL, Juventude Lacló Selebra 20 de Maiu Iha Ilimanu Tutun

Juventude aldeia Readodok, suku Lakumesak, postu administrativu Lacló, munisípiu Manatuto, hasai fotográfia hamutuk, hafoin realiza atividade marxa (laó-ain) durante loro- rua hahú 19 too 20-05-2020, hodi festeza loron nasionál Independénsia RDTL ba dala-XVIII iha foho tutun KURI Ilimanu, (20/5). Juventude aldeia Readodok, suku Lakumesak, postu administrativu Lacló, munisípiu Manatuto, hasai fotográfia hamutuk, hafoin realiza atividade marxa (laó-ain) durante loro- rua hahú 19 too 20-05-2020, hodi festeza loron nasionál Independénsia RDTL ba dala-XVIII iha foho tutun KURI Ilimanu, (20/5). Foto Suplai

Temopotimor (Dili)- Juventude iha aldeia Readodok, suku Lakumesak, postu adminístrativu Lacló, munisípiu Manatuto, komemora loron nasionál Restaurasaun Independénsia RDTL ba dala-XVIII (20/05/2002 to'o 20/05/2020) iha foho tutun KURI Ilimanu-Lacló.

Atividade marxa konjunta ne'e hala'o durante loron-rua hahú iha loron tersa-feira 19-05-2020, lao-ain komesa husi postu Lacló Villa no ohin loron kuarta-feita 20 fulan Maiu tinan 2020 to'o iha foho KURI.

Koordenadór Juventude aldeia Readodok, Ináçio de Jesus Carvalho hatete, objetivu prinsipál husi atividade marxa refere atu komemora loron nasionál Restaurasaun Independénsia RDTL ba dala XVIII (18) no inklu fó valorizasaun ba luta ne'ebé Asswain Fatlintil sira hatudu ona hodi liberta pátria Maubere.

“Atividade ne'e atu festeza loron Restaurasaun Independénsia RDTL nian hodi fó valórizasaun ba luta ne'ebé ita nia Falintil sira hatudu ona nomós atu fó omenajen ba érois ne'ebé fó aan mate, tanba defende povu no rai ida nee”, dehan Nia iha Lacló, kuarta (20/5).

Nia akresenta, razaun hili foho KURI hodi sai fatin ba festeza loron nasionál tanba, KURI sai nu'udár foho ida kulminante (aas liu) iha Lacló-Manatuto, no inklui sai nu'udár sítiu turístiku natural no relijiozu ba sarani katóliku tomak.

Kordenador ne'e mos husu ba juventude jerasaun foun hotu, atu presíza banati istória luta ne'ebé Falintil sira hatudu ona liu-husi funu ne'ebé halo durante tempu naruk iha ai-laran, tanba ne'e jerasaun ohin loron tenke sakrifika aan hodi la'o tuir Falintil sira nia ain-fatin, nune'e bele defini aan katak luta ba liberta povu no pátria RDTL laós fásil.

Iha sorin seluk, komunidade aldeia Ilimanu (Unir-leen), suku Uma-kaduak, Armindo da Cunha, sente haksolok ho prezensa juventude sira nian ne'ebé ba hamutuk ho sira hodi komemora loron nasionál 20 fulan Maiu tinan 2020.

“Ami iha ne'e sente haksolok tebes, tanba alin sira mai hamutuk ona ho ami hodi selebra mós loron nasionál timor-leste nian iha ami nia knua”, tenik nia ho haksolok

Nia enkoraja juventude sira atu kria nafatin eventu ne'ebé hanesan, hodi hatudu ba ema husi nasaun seluk katak, juventude iha Timor-Leste mós bele no iha ona kapasidade hodi hahú organiza malu.

Maske nune'e, nia apelu ba juventude katak bainhira atu realiza tan eventu ruma iha futuru, importante maka kria liña koordenasaun diak ho autoridade lokál sira hodi nune'e atividade hotu bele realiza ho diak no susesu.

Entretantu, totál membru Juventude ne'ebé ho espirítiu voluntarízmu hodi partisipa ona iha eventu komemorasaun ne'e, hamutuk ema nain 32, kompostu husi Feto nain 10 no mane nain 22, no atividade marxa ne'e la'o hahu husi Lacló to'o foho KURI kuaze oras 7 nia laran.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.