Bankada Sira Saúda Prezidente PN Foun Aniceto 

Lideransa bankada Tolu ne'ebe apoiu kandidatura Prezidente Parlamentu Foun, Aniceto Guterres iha konferensia de imprensa iha inisiu semana ne'e Lideransa bankada Tolu ne'ebe apoiu kandidatura Prezidente Parlamentu Foun, Aniceto Guterres iha konferensia de imprensa iha inisiu semana ne'e Foto Arkivu

Tempotimor (Dili)- Maske ho asaun vandalizmu no anarkizmu ne’ebé hatudu husi deputadu lubuk oan ida husi bankada parlamentár CNRT iha sala plenária parlamentu nasional nian, maioria deputadu realiza duni sesaun plenária iha ne’ebé deputadu sira vota ba pedidu destituisaun.

 Votasaun ba pedidu destituisaun ne’e, maka deputadu na’in 33 asina no hatama hasoru prezidente parlamentu nasional sesante, Arão Noé, iha loron-5 fulan-Maiu liu ba.

Ho prezensa iha sala plenária, deputadu sira husi bankada, FRETILIN, CNRT, PLP, KHUNTO, PD, UDT/FM no PUDD, liu husi votasaun, deputadu sira aprova ajenda plenária, nune’e, fó biban ba parlamentu nasionál vota ba pedidu destituisaun ba prezidente parlamentu. 

 

VIDEO BAKU RAHUN MEZA PPN

 

 

Iha votasaun, pedidu destituisaun ne’e hetan votus 36 afavor, 0 abestensaun no 0 kontra.

Nune’e, pedidu destituisaun pasa no efetivu imediatu.

Hafoin plenaria pasa deliberasaun ida ne’ebé fo dalan ba parlamentu nasionál atu hatama lista kandidatura ba prezidente parlamentu foun, deputadu sira hala’o kedas votasaun ba lista kandidatura ne’ebé mak tama. 

Aprezentasaun lista kandidatura, iha deit lista úniku ne’ebé mak aprezenta deputadu Aniceto Longinhos Guterres Lopes nu’udár kandidatu.

 

VIDEO PUBLISIDADE APELU HUSI PM TAUR APLAUS BA FRONT LINE

 

 

Iha votasaun ba lista kandidatura, deputadu Aniceto Longinhos Guterres Lopes hetan votus afavor 40, abstensaun 0 no kontra 0.

Nune’e, parlamentu nasionál eleje ona deputadu Aniceto Longinhos Guterres Lopes nu’udár prezidente parlamentu nasionál foun.

Votus 40 afavor ne’e mai husi deputadu sira husi bankada parlamentar PLP, FRETILIN, KHUNTO no PD. 

Deputadu sira na’in 25 husi bankada CNRT, UDT/FM, PUDD no deputadu na’in ida husi bankada PD mak, maske marka prezensa iha plenária, maibé la vota.

Deputadu sira husi CNRT mak komete áktu vandalizmu iha sala plenária nia laran to’o baku fila meza no kadeira prezidente parlamentu nasional nian, maibé CNRT nia deputadu balun seluk la partisipa iha asaun premanismu ne’e.

Ho situasuan ne’e, maka, liuhusi komunikadu, lider husi bankada tolu hato’o sira saudasoins ba povu Timor Leste ne’ebé maduru ho situasaun politika no enkoraja Prezidente PN foun atu bele susesu hodi lidera Parlamentu Nasionál iha futuru. 

“Lori ideransa bankada parlamentar PLP, FRETILIN no KHUNTO ha’u hakarak aproveita biban ida ne’e fó parabens ba povu Timor-Leste tomak tamba komporta diak los iha loron rua ne’e, wainhira deputadu sira halo problema to’o krimi iha sala plenaria parlamentu nian, povu sira hala’o sira nia atividade hanesan baibain,” vise-Xefe bankada PLP, deputadu Francisco de Vasconcelhos hatete. 

“PLP, FRETILIN no KHUNTO orgullu ho povu nia maturidade polítiku no apela atu kontinua komprtamentu hanesan hodi ita hamutuk haboot no haburas ita nia demokrasia,” deputadu Vasconcelhos hatutan. 

Nune’e mós, “ami hakarak hato’o ami nia agradesimentu ba deputadu sira husi bankada PD, UDT/FM no PUDD, no mós deputadu balu husi bankada CNRT, ne’ebé mak marka prezensa iha sala plenária iha loron rua ne’e, maibé mantein disiplina, orden no étika polítika iha parlamentu nasional.

Maske nune’e, ami kondena deputadu CNRT sira ne’ebé mak komete áktu vandalizmu iha sala plenária parlamentu nian,” vise-Xefe bankada FRETILIN, deputadu Francisco Branco hateten. 

“Ikus liu, ami hakarak hato’o agradesimentu no ksolok boot ba Vise-Prezidente Parlamentu Nasionál nain rua, deputada Maria Angelina Sarmento ho deputadu Luis Roberto ne’ebé ho korajen boot lidera plenária parlamentu nian hasoru áktus krimi ne’ebé deputadu CNRT sira komete iha sala plenaria nian,” deputadu Branco hatete tan. 

“Parabens ba Prezidente Parlamentu Nasional foun, deputadu Aniceto Longinhos Guterres Lopes no ami dezeiza katak ho itaboot nia lideransa, parlamentu nasional sei funsiona fila fali ho normalidade no kontribui ativu liu tan atu lori Timor-Leste sai husi impase polítiku ne’ebé ita nia rain enfrenta tinan 3 nia laran ona,” vise-xefe bankada KHUNTO, deputada Olinda Guterres hato’o.

Lideransa bankada PLP, FRETILIN and KHUNTO mós hato’o sira nia parabens ba povu Timor-Leste tomak ba anniversariu Loron Restaurasaun Independensia Repúblika Demokrátika Timor-Leste nian ba dala 18, ne’ebé sei selebra iha loron aban.

Tuir rejimentu parlamentu nasional estipula, rezultadu husi prosesu sira hotu iha plenaria parlamentu nasional ohin parlamentu komunika ona ba Prezidente Prezidente da Repúblika no Primeiru Ministru.

Rate this item
(0 votes)
Last modified on Wednesday, 20 May 2020 09:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.