Tempotimor (Dili)-Partidu Kongresu Nasionál Rekonstrusaun Timorense (CNRT) ne'ebé retira ona husi governu daualu hahu so'e piadas ba Partidu KHUNTO no deklara katak sei la hakfodak bainhira partidu Fretilin tama iha governu atuál no prienxe kadeira ne'ebé direitu CNRT nian.

 

"Partidu Khunto tamba hadomi liu povu, sees aan tiha husi koligasaun foun atu Khunto bele kontinua nafatin  iha VIII governu to’o 2023, tuir karta ne'ebé partidu Khunto haruka mai CNRT nomós ba Tribunal  Rekursu,"2⁰ vise prezidente partidu CNRT Virgilio Smith, soe piadas ba KHUNTO iha Konferensia Imprensa iha sede Partidu iha bairu dos Grillus, Dili (11/5).

 

 

CNRT mós agradese ba Khunto tanba hadomi povu, nune'e husik ona AMP foun hodi fila ba governu daualu. 

 

Liu tan Virgilio Smith, inklui iha lista membru Governu husi Partidu CNRT ne'ebe Prezidente da Republika rejeita fo pose ne'e dehan nia parte la hakfodak kuandu rona Partidu FRETILIN nia ema sira sei tama iha governu.

 

"Partidu CNRT la hakfodak bainhira haree katak pasta ka fatin sira ne’ebé dezde uluk kedas, iha Juñu 2018,  pertense por direitu ba membru CNRT, ne'ebé Prezidente Repúblika (PR) lakohi nomeia no la fó pose ho razaun katak iha kazu pendente iha tribunal no la tuir perfil, ne'ebé atu prienxe fali membru husi partidu Fretilin no PD," 2⁰ vise prezidente partidu CNRT Virgilio Smith haktuir.

 

 

 

Virgilio mós dehan, CNRT mós rona katak partidu Khunto aprezenta tan ona Leste membru governu foun hodi hetan pose.

 

"Primeiru Ministru (PM) tama-sai palásiu aitarak laran, hodi simu ka entrega lista foun, husi FRETILIN, ba membru governu no ikus ne’e rona katak iha tan lista husi partidu Khunto," dehan segundu vise prezidente partidu CNRT

 

Entretantu lista ne'ebé PM hatudu ba imprensa hodi fó sai ba públiku atu prienxe vaga governu daualu nian mai husi partido Fretilin ida mak husi PD.