Liu husi karta ho numeru 037/P.KHUNTO/IV/2020, iha 29 Abril 2020, hato'o pozisaun partidu KHUNTO hodi sai husi koligasaun ne'ebé forma hamutuk ho CNRT, PD, UDT, Frente-Mudansa no PUDD.

Razaun KHUNTO sai husi koligasaun ne'e tanba konsidera seidauk iha serteza ba solusaun impase politika iha Timor-Leste.

"Hare ba situasaun polemika rai-laran laiha serteza ba solusaun empase politika ne'ebe akontese durante tinan tolu nia laran, hanesan partidu politiku tenke iha pozisaun politika hodi fo solusaun ba impase politika ne'e," deklara karta ne'ebé asina husi Prezidente KHUNTO Armanda Berta no Sekretariu Jeral KHUNTO José Agostinho da Silva ne'e.

VIDEO PUBLISIDADE APELU HUSI PM TAUR APLAUS BA FRONT LINE

Iha karta ne'e KHUNTO dehan, situasaun Koligasaun AMP seidauk hetan konfirmasaun no aseitasaun husi Prezidente Republika ba ezistensia husi koligasaun refere hodi fo alternativu ba formasaun nonu governu.

Partidu KHUNTO konsidera ba deklarasaun konfiansa no apoiu tomak husi Prezidente Republika Fransisco Guterres Lu Olo ba iha Primeiru Ministru Taur Matan Ruak atu lidera nafatin oitavu governu konstitusional.

"Partidu KHUNTO hola parte iha estrutura oitavu governu konstitusional nune'e deside sei fo apoiu tomak ba oitavu governu konstitusional to'o iha tinan 2023," deklara KHUNTO.

Ho razaun iha leten, KHUNTO deklara hodi sai husi koligasaun AMP foun.

"Ho konsiente rasik iha momentu ida ne'e hakarak hato'o agradese Wain ba Maun boot Xanana Gusmão nu'udar lider partidu CNRT no AMP ho partidu PD, UDT/F-MUDANSA no PUDD ne'ebe durante ne'e ita servisu hamutuk, ho momentu importante ida ne'e iha situasaun difisil tebes mai Partidu KHUNTO atu foti desizaun, maibé tanba haree ba interese povu no ita-nia estadu mak Partidu KHUNTO foti desizaun sai husi Koligasaun AMP foun."

Partido KHUNTO promete sei tane nafatin Maun Boot Kay Rala Xanana Gusmão no prontu atu servisu hamutuk iha tempu oin ba interese povu no nasaun doben Timor-Leste.