FRETILIN konsidera, informasaun ne'e nu'udar lia falsu ne'ebé buka atu harii de'it deskonfiansa no mantein impase politika.
Adjuntu Sekretariu Jeral FRETILIN, José Reis, liu husi komunikadu imprensa ne'ebé www.tempotimor.com asesu iha Kuarta (29/04) hatete, iha loron hirak liu ba Sekretariu Jeral FRETILIN Mari Alkatiri fó sai nota klarifikasaun ida ba públiku ne’ebé husik mensajen klaru tebes, katak FRETILIN apoiu VIII Governu atu bele garante estabilidade governativa no buka dalan atu hakotu impase politiku iha rai laran.
Maibé, José Reis dehan, ohin, ema iresponsavel balu lansa rumor iha públiku katak Xanana Gusmão ho Mari Alkatiri, sei hasoru malu iha tempu badak nia laran.
"Ha’u hakarak informa ba públiku tomak katak informasaun kona ba Sr Xanana no Kamarada Sekretariu Jeral Mari Alkatiri atu hasoru malu ne'e falsu, tanba to’o ohin loron seidauk iha komunikasaun ka aprosimasaun ruma mai FRETILIN husi Sr. Xanana atu hasoru malu ho Sekretariu Jeral FRETILIN,” ," deklara José Reis liu husi komunikadu ne'e.
VIDEO PUBLISIDADE APELU HUSI PM TAUR APLAUS BA FRONT LINE
Lori lideransa FRETILIN nia naran, José Reis apela ba kuadru, militante no simpatizanti FRETILIN sira hotu no husu ba públiku tomak atu labele monu ba lia falsu sira ne’ebé ema balun fó sai.
Tuir nia, informasaun falsu ne'e bele mai ho intensaun atu hamosu deskonfiansa no atu koko estraga servisu tomak ne’ebé líder sira hala’o dadauk atu buka estabilidade governativa no hakotu impase politiku iha rai laran.
Husi uluk kedas to’o ohin loron, Adjuntu Sekjer ne'e dehan, FRETILIN sempre buka atu inkluzivu no buka dalan atu bele kontribui ba estabilidade nasional no atu hadia povu nia moris hodi bele sai husi kiak no mukit.
Nia hatutan, FRETILIN sempre nakloke atu hasoru malu ho forsa polítika hotu-hotu, no sempre informa ho transparensia kona-ba rezultadu sira ne’ebé reál no importante ba nasaun no povu TL tomak.
“Aban-bainrua, iha tempu badak ka naruk, se iha duni enkontru ruma, FRETILIN rasik mak sei informa ba públiku tomak,” dehan Adjuntu Sekjer ne'e.