CNRT Rejeita Jacinto Rigoberto Ameasa Naimori

Sekretariu Jeral Interinu Partidu CNRT, Jacinto Rigoberto (Klaran) ho deputada Bi Soi no deputada bendita ko'alia ba midia (28/4) Sekretariu Jeral Interinu Partidu CNRT, Jacinto Rigoberto (Klaran) ho deputada Bi Soi no deputada bendita ko'alia ba midia (28/4) Foto Januario Varrela

Tempotimor (Dili)-Bankada CNRT iha Parlamentu Nasionál (PN) rejeita akuzasaun katak Sekretáriu Jerál interinu CNRT Jacinto Rigoberto ameasa Konselleru másimu Partidu KHUNTO José dos Santos "Naimori Bucar".

Bankada CNRT liu husi konferensia imprensa dehan, akuzasaun ba Jacinto Rigoberto nu'udar akuzasaun falsu.

“Partidu CNRT dezmente totalmente akuzasaun falsu hasoru kompañeiru Jacinto Rigoberto," deklara Vise Prezidente Bankada CNRT, Patrocino dos Reis, iha salaun bankada CNRT, Tersa (28/04).

Patrocino dehan, bankada CNRT lamenta ho akuzasaun organizadu ne'ebé bankada FRETILIN levanta mós iha plenaria PN.

Tuir bankada CNRT, durante kareira politika Jacinto Rigoberto laiha ligasaun ho autoriedade seguransa.

"Kompañeru Jacinto Rigoberto hanesan ema sivíl ida, iha ninia kareirra politika tomak nia servisu laiha relasaun ho servisu militar no polisia nian, ka foti parte iha grupu armada sira iha ita nia pais demokrétiku ida ne'e," dehan Partocino.

Patricino hatutan, dezde inisiu CNRT laiha programa fahe kilat ba grupu armadu atu halo ameasa ba ema see de'it, tantu politiku sira no ema estranjeiru iha TL.

Tuir nia, iha istória rezolusaun ba konflitu iha TL, CNRT mak dezde inisiu kedas iha tinan 2006 fera ulun hodi rezolve azneiras fahe kilat, no tanba ho lideransa Kay Rala Xanana Gusmão, TL bele ultrapassa konflitu sivil armadu.

Taan ne'e, Vise Prezidente bankada CNRT ne'e afirma, akuzasaun katak Sekjer interinu CNRT ameasa Naimor nu'udar akuzasaun falsu.

"Akuzasaun bosok no falsu hasoru kompañeru Jacinto Rigoberto no Partidu CNRT hatudu momoos ba povu tomak katak iha ona grupu organizadu ho nia imunidade subar iha Parlamentu Nasionál, ho sistemátiku halo beibeik politika foer hasoru ninia proponente politiku sira," dehan Patrocino.

Ho nune'e, CNRT husu ba autoridade kompetente atu halo lalais investigasaun profunda hodi bele hatene motivu no see mak envolve.

"Bankada CNRT husu ba Ministériu Públiku no PNTL atu halo lalais investigasaun profunda sobre “missão oculta ka objetivu sasubar” iha kazu ida ne’e. Atu buka hatene envolve see de'it, no objetivu sira nian ba saida loos."

Iha biban ne'e, CNRT mós husu ba deputada bankada KHUNTO Olinda Guterres, atu esplika no klarifika ba públiku sobre informasaun falsu ne'e.

CNRT afirma, Jacinto Rigoberto no partidu CNRT sei lori prosesu ne'e ba oin hodi husu responsabilidade ba ema hirak ne'ebé mak halo akuzasaun falsu hodi hetan hikas naran di'ak no lia loos.

 

Rate this item
(1 Vote)
Last modified on Tuesday, 28 April 2020 14:53
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.