Iha mós hanoin balun husi deputadu CNRT balun ne'ebé hatete katak KHUNTO sai ona husi Aliansa Maioria Parlamentar (AMP) foun ne'ebé forma iha fulan hirak kotuk ba.

Ba kestaun ne'e, Deputadu Bankada KHUNTO no atual Vise Prezidente PN, Luis Roberto hatete, se deputadu bankada CNRT mak deklara nune'e, karik loos duni.

"Ha'u halai ba iha polítika, se bankada CNRT mak dehan hanesan ne'e iha públiku, karik ne'e loos, tanba sira mak esperiénsia liu, sira mak bankada boot liu iha PN, kuandu sira ko'alia katak realidade ne'ebé horseik KHUNTO apoiu hodi estende estadu emerjénsia ne'e mak sira interpreta katak ida ne'e sobu ona AMP kala ida ne'e mak loos," dehan Luis iha PN, Tersa (28/04).

Ba pozisaun KHUNTO relasiona ho votus a favor ba estensaun EE, deputadu ne'e hatete, KHUNTO sempre fó apoiu iha kualker momentu ba governu hodi kombate surtu Covid-19.

"Ami KHUNTO sempre apoiu governu ida ne'e par kombate surtu Covid-19, maibé bankada CNRT dehan ida ne'e sobu malu ona, ida ne'e mós di'ak, loos ba sira," dehan nia.

Membru Konsellu Superior KHUNTO ne'e hatete, KHUNTO prontu atu halo tuir saida mak CNRT koalia.

"Se sira dehan sobu malu ona, ami atu halo saida, ami bankada kiik so apoiu de'it, importante mak kria estabilidade iha rai laran, inklui harii unidade nasional par hamutuk kombate surtu Covid-19," nia dehan

Entretantu, ohin, Tersa (28/04), bankada AMP hala'o reuniaun iha salaun bankada CNRT nian, maibé tuir observasaun jornalista www.tempotimor.com, iha enkontru ne'e laiha partisipasaun husi deputadu sira husi bankada KHUNTO.

Molok ne'e, iha kualker enkontru entre partidu sira ne'ebé envolve an iha AMP foun, KHUNTO sempre envolve.

"Ha'u enkontru iha bankada CNRT ne'e la partisipa, maibé karik konvida xefe bankada KHUNTO nian mak ba partisipa, maibé to'o agora laiha konvite hodi partisipa iha reuniaun bankada CNRT nian," dehan deputadu ne'e.