Tempotimor (Dili)-Parlamentu Nasionál (PN) husu governu no Polísia Nasionál Timor Leste (PNTL) atu halo investigasaun kle'an ba autór sira ne'ebé uza armas estadu nian hodi halo ameasa ba Konselleru Másimu Partidu Khunto, José dos Santos "Naimori Bucar" iha nia rezidensia iha Fatu Meta besik diresaun eskola DIT, sesta semana kotuk.
"Átu ne'ebé hala'o iha semana kotuk hasoru señor Naimori nu'udar lider partidu politiku ida ne'ebé iha nia reprezentante iha uma fukun ida ne'e, ami hein katak, iha investigasaun kle'an, ba autor sira ne'ebé uza forsa no kilat povu nian hodi hamatan liberdade no demokrásia iha ita nia rai doben ida ne'e," alerta Vise Prezidente bankada Fretilin deputadu Francisco Miranda Branco iha plenária PN, Segunda (27/04)
Entretantu deputadu bankada Khunto Luis Roberto mós realsa katak, informasaun ameasa ba Naimori ne'ebe mos hanesan membru Konsellu Superiór Defeza no Seguransa ne'e informa ona, iha sesta semana kotuk bainhira enkontru lider bankada ne'ebe partisipa mós husi reprezentante governu nian.
"Oknum balun ne'ebé mak uza oportunidade estadu emerjénsia ida ne'e, halo polítika fali buat ne'ebé ita hotu lakohi para atu akontese iha nasaun ida ne'e, ida ne'e mak hau hato'o iha ne'ebá. Hau fiar katak iha ona governu nia liman atu halo prosesu ba ida ne'e," dehan Roberto
Entretantu prezidente bankada CNRT Duarte Nunes mós afirma, presiza halo andamentu ne'ebé di'ak.
"Komandante PNTL mós iha ne'e bele rejista, halo favór andamentu ba ida ne'e, ita hakarak tranparansia, prosesu to'o iha ne'ebé favór informa mai plenária tanba ita ne'e naran di'ak ami nia kompañeru nia no partidu," dehan Duarte
Iha fatin hanesan, deputadu PD Mariano Assanami Sabino mós apoiu atu halo investigasaun kle'an.
"Ami apoiu para halo investigasaun kle'an kona-ba ida ne'e tanba ita sira ne'ebé moris ne'e kontinuidade ba RDTL ne'ebé ema rihun 300 mak mate ba rai ida ne'e para ita ukun aan, PNTL no F-FDTL liman kroat povu nian, labele halo ameasa ba ema ida nein partidu politika, tanba ne'e ami husu para halo investigasaun ba ida ne'e, para ba oin labele akontese tan," dehan Assanami
Átu ne'ebé akontese, PN konsidera nu'udar átu ne'ebé hakanek prinsísiu konstituisionál, demokrásia, estadu direitu demokrásia no hakanek liberdade.
Liu tan, átu brutalizmu ne'e akontese niha Sesta semana kotuk, pelumenus iha tuku 11:45 atu tama ona ba meudia iha rezidensia Konselleru Másimu partidu Khunto José dos Santos "Naimori Bucar" iha ne'ebe antes akontesimentu Konselleiru Partidu KHUNTO ne'e simu vizita husi kuadru husi partidu ida hodi hato'o konvite ruma.