"La haluha ami nia deskulpa ba pesoal saude no seguransa sira ne'ebe durante ne’e akompana ami. Tanba dala barak ami kritika. Tanba ami iha duvida, dalaruma ami nia lia-fuan no hahalok la monu ba ita boot sira nia laran, bei-beik ne'ebe ami halo. Tanba ne'e iha momentu ida ne'e reprezenta kolega sira hotu nia naran, husu deskulpa ba ita boot sira no Membru PNTL sira hotu", dehan reprezentate pasiente Covid-19 rekoperadu, iha Sentru Saude Vera Cruz, sabdau (25/4).
VIDEO TIMOROAN REKUPERA ONA COVID19 HUSU DESKULPA
https://www.youtube.com/embed/iw0tRoL5tkM
Timoroan na'in lima ne'ebe rekuperadu no sai husi sala izolamentu iha sentru saude vera Cruz antes ne'e na'in rua kuarentena iha Hotel Katuas, na'in rua iha Hotel Fortuna no nain ida seluk kuarentena iha Hotel Novo Horizonte.
”Agradese mos ba Sentru Integradu Jestaun Krizi (SIJK) ho nia ekipa sira ne'ebe durante ne'e halo esforsu makas atu salva ami nia saude," reprezentante ne'e hato'o.
Nia esplika katak Kona ba ai-moruk hodi kura Covid-19 sidauk iha, maibe ho imunidade forte bele reziste hasoru virus sefere.
"Iha ne'e ami hetan tratamentu masimu husi pesoal saude sira, la'os dehan tratamentu ho ai-moruk atu kura Covid-19, maibe ami iha ne'e kuandu isin manas mediku sira fo ai-moruk isin manas nian, mear sira fo ai-moruk mear nian", Nia relata.
"Iha liur, ou publiku dehan ai-moruk kura Covid-19 nian la iha, maibe moras ne'e atu diak oinsa? Hau atu dehan de'it ba publiku katak, sim los duni ai-moruk la iha, maibe ami iha ne'e bele rekupera tanba ho imunidade forte. Husi imunidade forte ne'e bele kura rasik virus ne'e. Ami rekupera atu fila ona ba uma la haluha agradese nafatin ba ita boot sira nia esforsu no sakrifisiu ho pasensia ne'ebe durante ne'e halo ba ami", Nia haktuir
Reprezentate pasiente Covid-19 rekoperadu ne'e apella ba bubliku tomak mantein kumpri nafatin regras no lei ne'ebe Ministeriu Saude fo sai ona hanesan Distansia sosial, distansia fiziku, Fase liman beibeik ho sabaun no tenke uza maskra.
