Deputada Bankada FRETILIN, Maria Angelica hateten, uluk UNTL presiza regra iha rezime espesiál ne’e rasik, estudante ne’ebé naran iha rejime jerál hamutuk alunu 2.896, bainhira tama ona iha rejime espesiál ne’e, tuir planu UNTL hamutuk 440.
"Maibé tinan ne’e, Ministeriu Edukasaun Ensinu Superior simu volume estudante aas tebes ho total estudante 7.000", dehan nia, iha Uma Fukun PN, Segunda (18/2).
Rejime espesiál UNTL rasik fo dalan atu simu veteranu nia oan sira iha rejistrasaun hamutuk 7.000, maibe infelizmente ministru tutela hakarak simu deit 500. Signifika restu labele asesu ba UNTL.
“Kuandu ita-nia veteranu nia oan sira laiha oportunidade hodi eskola iha UNTL maka sei iha problema boot", tenik nia.
Informasaun ne’ebé deputada ne'e hetan, estudante sira konsentra iha Komite 12 Novembru hodi deklara karik laiha mudansa ba desizaun sei mosu manifestasaun.
Iha fatin hanesan deputadu Bankada Partidu Demokrátiku (PD), António da Conceição, husu ba Ministériu Edukasaun Ensinu Superior atu buka solusaun ba problema ne'e.
Tuir eis-Minstru Edukasaun ne'e, problema ne’e sai referensia ba Ministériu Edukasaun Ensinu Superior presiza loke tan universidade iha munisipiu sira, hanesan harii iha fronteitra no iha ponta leste, nune’e rezolve problema ne’e.