Deputadu Domingos Lemos liu husi plenaria PN fó ideia ba governu atu bele fasilita ema ne'ebé rekopera ona hodi hato'o ninia esperensia kona-ba situasaun ne'ebé nia hasoru durante izola iha fatin izolamentu.

"Nusa mak ita la lori sai ita-nia pasiente ne'ebé kuradu ne'e atu esplika ba populasaun tomak kona-ba situasaun ne'ebé nia hasoru. Lei mak la fó dalan ka oinsa? ka segredu saúde nian balun mak la fó dalan karik?," dehan deputadu Domingos, Tersa (21/04).

Tuir deputadu ne'e, iha nasaun balun kuandu ema kuradu husi Covid-19 tenke fó sai par bele fahe nia esperiénsia.

"Ita haree iha fatin barbarak kuandu pasiente di'ak ona ema fó sai nia naran, par ema bele husu esperiénsia ruma ba pasiente ne'ebé durante ne'e afetadu husi Covid-19 maibé ikus mai hetan kura," nia dehan.

Iha situasaun daudauk ne'e, deputadu ne'e hatete, presiza atu ema ne'ebé livre ona husi Covid-19 atu hato'o ninia esperensia.

"Nia mak bele esplika, tanba durante ne'e ita koalia teoria katak moras ne'e nia sintomas mak kakorok moras, ida nia paru-paru dada iis ladi'ak no buat seluk tan, mais ita ne'e teoria de'it, mais ida agora di'ak ona ne'e nia di'ak ona husi Covid-19 presiza konta nia esperiénsia."

Iha fatin hanesan deputadu Bankada KHUNTO António Verdial aseita mós ho ideia atu ema ne'ebé livre ona husi Covid-19 fahe ninia esperensia.

"Ida ne'ebé di'ak ne'e tenke ko'alia sai nia esperiénsia, agora doutór ida mai dehan kazu agora sa'e ba 22, mais ema ne'ebé moras ne'e ita la hatene iha ne'ebé, halo saida, saida mak sira hasoru no saida mak governu halo ona ba sira, ida ne'e mak importante," dehan Verdial.

Iha parte seluk www.tempotimor.com halo ona esforsu atu dada lia ho ema ida ne'ebe rekopera dahuluk husi sentru Saude Vera Cruz maibe sei iha obstakulu.