Bankada Demokrátiku (PD) ne'ebe hola parte iha koligasaun AMP foun husu VIII Governu Konstitusionál atu envolve lidér nasionál sira, liuliu Xanana Gusmão, iha kombate surtu Coronavirus Disease 2019 (Covid-19), iha Timor-Leste.
Prezidente Bankada PD no Portavoz AMP Foun, António da Conceição katak, planu atu estende Estadu Emerjénsia governu tenke envolve lider nasionál sira hodi garante ba populasaun sira.
Entretantu Bankada PD mós aprezenta proposta oinsa governu estabelese Konsellu Nasionál hodi envolve Xanana, Marí no Horta iha kombate Covid-19.
Estabelesimentu Konsellu Nasionál ne'e atu fó konfiansa ba lideransa na'in tolu atu halo servisu.
"Kriasaun Konsellu Nasionál nee, atu Primeiru Ministru atu tau fiar ba Xanana Gusmão hodi koordena atividade ba kombate surtu Covid-19, servisu asistensia sosiál no mós seguransa ligadu kombate Covid-19", dehan nia, iha Plenária PN, Tersa (21/4).
PD mós husu governu atu nomeia Ramos Horta atu halo kampaña internasionál.
Nune'e, Marí Alkatiri hodi envolve iha planu médiu ba dezenvolvimentu nasaun nian.
Proposta ne'e Bankada PD aprezenta hodi tulun governu hala'o nia responsabilidade servi nasaun no serví povu. (*)