Komadante Polisia Nasional Timor-Leste (PNTL) munisipiu Dili Armando Monteiro Informa, estudantes sira ne'e lakohi koopera, tanba hakarak hatene mos servisu espesifiku balun ne'ebe mediku sira hala'o.
"Ohin dadersan tuku 9 ita nia mediku iha kuarentina Leokassi ne'e atu halo atendimentu ba sira, maibe tanba ita nia alin sira iha ne'e la kolabora no sira lakohi ita nia mediku sira halo eskreming ba sira nia saude", dehan Nia iha aredores Hotel Leokassi, tersa (21/4).
"Ho atetude ne'e mak komunika hau ho Doutor Narcisio Fernades hodi nune'e to'o mai iha ne'e hodi komunikasaun ba sira atu nune'e sira tenke kumpri no halo tuir ita nia pesoal saude sira ne'ebe mak durante ne'e hamutuk ho sira hodi halo asistensia ba sira loron ba loron", tenik Nia
Komadante ne'e esplika, Estudantes hirak ne'e talves hatudu sira nia karakter atu hakarak hatene hotu servisu espesiais sira ne'ebe pesoal saude sira hala'o.
"Ita hare ba fatin hirak ne'ebe mak akontese karakteristika ita nia estudantes sira ne'e talves iha servisu espesifiku balun ne'ebe mak talves mediku hala'o, maibe sira mos obriga mediku sira hakarak hatene, entaun husi ida ne'e mak hodi sira la kolabora ou tenta rezeita no ameasa i intemida ita nia mediku sira", Nia haktuir
Entertantu antes ne'e pesoal saude hasai ona estudantes nain 34 ne'ebe tama kuarentina obrigatoriu iha Hotel Leokassi ekipa laboratorium nasional hasai ona nain 3 nia amostra no dadaun iha hela prosesu teste.