Hanesan públiku hatene, molok ne'e komisaun liña ministerial aprova ona proposta ba extensaun estadu emerjensia. Proposta refere sei aprezenta ba Konsellu Ministru hodi diskuti no aprova molok haruka ba Prezidente Repúblika hodi dekreta.

Prezidente Parlamentu Nasionál Arão Noé de Jesus da Costa Amaral hatete, governu tenke aprova ona subsidiu ba povu.

"World Health Organization (WHO) dehan ita-nia estaminia kuandu la di'ak moras ne'e rasik atu tama iha ita-nia isin," dehan Arão iha Parlamentu Nasionál, Segunda (20/04).

Tuir nia, atu hetan hahan, tenke iha osan hodi bele sosa.

"Atu iha hahan sufisiénte tenke iha osan par hola sasan, tanba ne'e mak ita tenke hanoin par oinsa solusiona povu nia moris," dehan nia.

Arão hatete, iha nasaun balun sira-nia sidadaun mate la'os tanba de'it Covid-19 maibé mós tanba hamlaha.

"Nasaun barak ne'ebé nia númeru (Covid-19) mate barak ona, entaun sira loke ona estadu emerjénsia par buka moris, tanba nivel mate iha oin rua, mate ba moras, seluk mak mate ba hamlaha."

Tan ne'e, nia afirma, iha situasaun ohin loron, povu Timor-Leste presiza intensivu atu bele moris hodi hakat liu situasaun ne'e.

Molok ne'e, mosu ideia husi deputadu balun iha PN atu governu fó subsidiu ba povu ho osan $100 no foos saku rua ba kada uma-kain.

"Se bele subsidiu ba povu sira ne'e fó osan $100 hamutuk ho foos saku rua par sira bele aguenta fulan ida ne'e, par osan ne'e sira bele hola sasan seluk," dehan deputadu Mariano Assanami Sabino.