Governu husu aprezenta-aan atu bele halo teste saude ba ema sira ne'e atu labele fo risku ba familia no sidadaun sira seluk relasiona ho moras Coronavirus Disease 2019 (Covid-19).

Primeiru Ministru, Taur Matan Ruak hateten, sidadaun ne'ebé mai ho dala ilegalmente tenke rona governu, see lakohi responsabilidade la'ós governu nian.

"Sira lakohi rona, ne'e responsabilidade sira nian tomak, la'ós governu nian. Se sira la rona, sira infekta ba sira-nia familia, tanba ne'e responsabilidade sidadaun sira ne'ebé mai, la'ós Estadu nian," dehan PM Taur, iha Palásiu Prezidensiál, Bairru-Pité, Sesta (17/4).

Xefe governu ne'e dehan, antes ne'e governu hanoin ona fó insentivu, maibé sidadaun barak mak deside mai ona teritóriu nasionál.

"Ita fó insentiva para hela iha ne'ebá, mas barak mak deside mai ona," dehan PM.

Xefe governu mós dehan, sidadaun tenke aprezenta aan para governu  kontrola.

"Sira ne'ebé mai, importante mak ita kontrola para labele da'et ba sira nia familia, inan-aman, tanba bainhira da'et ba inan-aman la'ós lori matenek mai maibé lori fali mate mai," nia tenik.

Governu Kontinua apelu, bainhira sidadaun mai, tenke aprezenta aan, lalais ba instituisaun sira ne'ebé kontrolu iha fronteira.

"Tenke aprezenta aan lalais ba instituisoens sira ne'ebé kontrolu iha fronteira haneasan Polísia no pesoál saúde sira, tanba ne'e sira tenke konsiente katak ne'e la'ós buat halimar nian, tanba buat ida ne'ebé oho ema nian," nia dehan.

Antes ne’e, Portavoz Sentru Integradu Jestaun Krize, dra. Odete da Silva Viegas iha Konferensia ba Imprensa iha Sala Situasaun iha CCD iha Loron Kinta (16/4) lamenta, sidadaun sira kontinua tama ilegalmente mai teritóriu Timor Leste husi nasaun vizinu Indonezia.

"Ita hotu hatene katak fronteira terestre no aero ita taka hotu ona, maibé sidadaun sira kontinua tama ilegál, agora presiza mak presiza servisu seguransa iha liña fronteira terestre nian," dehan Portavoz SIJK Dra. Odete ba jornalista sira iha sala situasaun, Kinta (16/04)

Nia mós dehan, seguransa iha fronteira terestre la'ós Polísia de'it, maibé apoiu mós husi autoriedade munisípiu nian.

"La'ós sira polísia de'it,  maibé autoriedade munisípiu, xefe suku, xefe aldeia sira presiza apoiu liuhusi koordenasaun," nia hato’o.