Ministru ne'e hatete, to'o ohin loron MAE seidauk fó orientasaun ba suku sira atu prepara dokumentus ba subsidiu nian.
“Ministériu la orienta hodi halo preparasaun, aat liu tán mak sira husu kobransa ilegál ba populasaun bainhira komunidade sira ba foti fixa familia,” dehan Ministru Abilio iha Sentru Konvensaun Dili, Kuarta (15/04).
Bainhira rona informasaun ne'e, nia hatete, nia haruka kedan mensajen ba prezidente autoridade hodi bolu atensaun ba autoridade lokal sira.
“Bainhira informasaun ne'e sai iha televizaun, ha'u haruka kedan mensajen ba administradór no prezidente autoridade munisípiu hodi bolu atensaun direitamente ba xefe suku Komor no Fatuhada," dehan nia.
Nia hatete, fixa ne'ebé governu prepara sei fó gratuita ba kada familia.
"Fixa ne’ebé governu prepara no fahe ba xefe familia sira kada uma-kain ne’e gratuita, nune’e la presiza halo kobransa ba komunidade hodi hetan ida ne’e," dehan Abilio.