Kordenador Planeamentu Monitorizasaun SIJK, Narcizio Fernandes hatete, jeralmente ema sira ne'ebé tama iha kuarentena obrigatoriu disiplina, maibé iha balun mak malandru.
"Ami rona informasaun iha kuarentina disiplina, mesmu iha ida rua ne'ebe malandru uitoan," dehan nia iha Hotel Farol, Domingu (12/04).
Maske nune'e, Narcizio agradese ba Maromak tanba sira bele pasa ona periodu kuarentena no bele fila ona ba idaidak nia familia.
Tuir dadus, ema na'in 116 husi fatin kuarentena 4 iha kapital nasaun Timor Leste mak livre ona. Kompostu husi, Hotel Farol na'in 30, Hotel Kolmera ema na'in 27, Hotel Desity na'in 30, no Hotel Novu Horizonte na'in 29.
"Ita-boot sira kompleta ona loron 14 iha kuarentina, maibé la signifika ita-boot sira negativu, tanba depois de ita-boot sira sai husi iha ne'e keta la kumpri regras prevensaun bele hetan fali risku," dehan nia.
Tan ne'e, nia husu bainhira fila ba komunidade nia leet kontinua kumpre regras pevensaun ne'ebé fó sai ona katak sei tuir auto kuarentena iha ida-idak nia uma to'o loron 14 no evita atividade deznesesariu.