PM Taur dehan, iha tinan ida ne'e festa ba Jejus nia moris hias la hanesan ho tinan baibain, tanba la halo selebrasaun iha igreja.
"Iha loron paskoa loron importante loos, loron familia nian, felizmente ita-nia festa tinan ida ne'e la hanesan baibain, tanba moras ne'ebé dadaun ne'e la'o husi mundu inklui ita Timor ne'ebé la sees husi moras ne'e," dehan Xefe Governu ne'e iha Palásiu Prezidensiál Bairro-pite Dili, Kuarta (08/04/2020).
Tan ne'e, nia hatete, aproveita semana paskua ne'e hodi hasa'e orasaun ba Maromak atu tulun nafatin ninia kriatura, liu-liu hasees Timor-oan sira husi Covid-19.
"Ha'u husu ba sidadaun sira hotu, kontinua nafatin kumpri regras, depois iha uma halo meditasaun, husu Maromak tulun ita ida-idak no familia, no mós ita nia nasaun par hasees moras ne'e ba ita-nia familia," dehan PM Taur.
Entretantu, PR Lu Olo husu mós ba entidade hotu atu kontinua kumpri regras ne'ebé governu fó sai ona.
"Apela ba povu tomak kumpri regras saúde ne'ebé governu fó sai ona, hodi nune'e prevene kontaminasaun husi corona virus," dehan Lú-Olo.
Tuir Lu -Olo, bainhira ema idaidak prevene an husi moras, signifika nia kontribui mós ba familia no povu ne'ebé saudavel.
"Kuidadu ita-nia saúde, proteje ita-nia familia, no defense ita-nia povu," PR Lu Olo apela.