"Maluk timor-oan sira ne'ebé iha rai liur mak nunka rejistu iha embaixada hodi hatene, tenke ba aprezenta aan no hatudu dokumentu ne'ebé mak embaixada sira hasai, hanesan kartaun eleitoral, surat husi eskola no hatudu katak nia timor-oan duni," dehan Dionísio Babo iha Sentru Konvensoens Dili, Kuarta (08/04/2020)
Xefe Diplomata Timor nian ne'e afirma inan-aman ne'ebé iha Timor bele fasilita mós oan sira iha estranjéiru.
"Estudante timor-oan ne'ebé inan-aman selu rasik eskola, se bele inan-aman sira mós ajuda haree no aprova depois ita apoiu," dehan Babo.
Ministru Babo hatete liu husi meiu aprezenta identidade pesoál ne'e atu governu bele apoiu timor-oan sira ne'e atu kuidadu a’an no kontinuja hela iha nasaun refere
Iha okaziaun hanesan, Ministru Babo mos informa ba publiku relasiona ho situasaun traballadór Timor-oan iha Australia no Korea do Sul.
"Traballadór sira, ita nafatin kontaktu governu Australia no Korea para apoiu nafatin sira, ba estudante bolseiru sira ita nafatin fó osan bolseiru nian maske sira la eskola, maibé estudante sira ne'ebé ba privadu de'it mak governu apoiu," dehan Babo.
Entretantu tuir rekezitus ne'ebé tempotimor.com asesu kona-ba estudante sira aprezenta aan ba embaixada iha Indonézia mak hanesan kartaun eleitoral no seluk tan.
"Naran kompleitu, hela fatin, estuda iha universidade ne'ebé, bolseiru ka la'ós, númeru kontaktu no WA, Email, númeru konta bankária iha Indonézia, inan-aman nia naran kompleitu no hela fatin inklui númeru kontaktu inan-aman nian, ne'ebé aneksa ho fotokopia pasporte no kartaun estudante," hateten iha rekezitus ne’e.