Tempotimor (Dili)-Maske regra estadu emerjensia "bandu" atu sidadaun halibur malu, maibé ida ne'e la vale ba lider no membru koligasaun foun Aliansa Maioria Parlametar (AMP).
Iha Domingu, AMP realiza enkontru alargada ida ne'ebé lidera husi Prezidente CNRT Kay Rala Xanana Gusmão.
Ministra Finansas (MF) interina Sara Lobo Brites ne'ebé marka prezensa iha enkontru refere nu'udar konvidadu hatete, enkontru ne'e aplika regras estadu emerjensia nian.
"Iha enkontru ne'e aplika hela regra sira hanesan fase liman, uza maskara, inklui distansia sosiál, depois ha'u ba hanesan konvidadu la'ós ha'u mak realiza," dehan Ministra Sara iha Palásiu Governu, Segunda (06/04/2020).
Iha fatin hanesan Ministru Defeza no Seguransa (MDS) Filomeno da Paixão de Jesus dehan, enkontru ne'ebé lidera husi Xanana la'ós buat aat.
"Avó Nana fó ideia kona-ba krize corona virus nian, liu-liu ami ne'ebé iha governu entaun mai hato'o ideia sira ne'e ba Primeiru Ministru (PM) Taur Matan Ruak, oinsa labele importa covid-19 mai ita nia rai," dehan nia.
Nia dehan, iha enkontru refere kontinua mantein regras estadu emerjensia.
"Iha ne'ebá mantein distánsia sosiál no seluk tan, entaun la'ós buat aat ida ne'ebé ita rona, tanba maun boot hakarak fó nia kontribuisaun ha'u hanoin pozitivu," nia dehan.
