Print this page

Hakat Tuir Eis MS Interina Elia Nia Ain-fatin ne'ebé "Kleuk"

Eis Ministra Saude Elia Antonio dos Reis Amaral bensa Primeiru Ministru Taur Matan Ruak nia liman iha momentu ruma kotuk Eis Ministra Saude Elia Antonio dos Reis Amaral bensa Primeiru Ministru Taur Matan Ruak nia liman iha momentu ruma kotuk Foto File

Tempotimor (Dili)-Dekretu ne'ebé Prezidente Repúblika fó sai bazeia ba pedidu husi Primeiru Ministru Taur Matan Ruak hodi demite Elia dos Reis Amaral husi kargu nu'udar Vise Ministra Saúde, sai nu'udar huun husi asaun kontra-versaun ne'ebé Elia halo durante sai membru governu Konstitusional daualu.

Iha governu konstitusional daualu ne'ebé lidera husi Primeiru Ministru Taur Matan Ruak, Elia dos Reis Amaral ne'ebé reprezenta partidu CNRT hetan konfiansa hodi sai nu'udar Vise Ministra Kuidadu Saúde Primaria, hamutuk ho reprezentante partidu PLP Bonifacio Maucoli dos Reis ne'ebé asume kargu nu'udar Vise Ministru Saúde ba Dezenvolvimentu Estratejiku Saúde.

Bainhira Prezidente Repúblika pendente membru governu na'in sia (9), inklui mós kandidatu ba Ministru Saúde, Vise Ministru na'in rua ne'e hetan fiar atu troka malu hodi asume kargu nu'udar Ministru Saúde interinu.

Elia hahú hamosu sensasaun bainhira mosu informasaun iha 31 Maiu 2019 katak Vise ministra ne'e halai husi enkontru ne'ebé Organizasaun Saúde Mundial realiza iha Jenebra, Suisa, hodi mai pasiar iha Bali, Indonezia.

Lee mós: Vise MS Elia Halai husi Enkontru iha Jenebra Mai Pasiar iha Bali

Maske ikus mai informsaun ne'e hetan kritika no Vise MS rekuza, maibé informasaun ida ne'e sai inisiu husi konflitu entre Vise MS na'in rua, Elia no Maucoli.

Konflitu entre Vise MS na'in rua ne'e hahú mosu neneik bainhira Elia no Maucoli hatudu idaidak ninia poder bainhira sai Ministru Saúde interinu.

Lee mós: “Funu” Despaisu MS Interinu, Kada Fulan 6 Troka Komisaun Avaliasaun ba Projetu

Bainhira ida sa'e ba Ministru interinu nia sei hasai despaisu hodi revoga despaisu ne'ebé ministru interinu uluk hasai.

Konflitu entre Elia ho Maucoli ikus mai aI viral bainhira sira na'in rua deskuti-malu no ninia gravasaun espalla iha media sosial.

Tuir informasaun husi fonte balun iha palasiu governu, durante asume nia kargu nu'udar Vise MS, Elia dala-barak la obedese ba desizaun ne'ebé PM Taur foti.

Fonte ne'e hatete mós katak, iha enkontru Konsellu Ministru, Elia dala-barak hataan PM Taur ne'ebé lidera hela enkontru KM.

Maske la obedese ba ninia superior, no iha ezijensia balun husi deputadu sira iha PN inklui lideransa balun husi CNRT atu hasai Elia husi nia kargu, maibé PM Taur mantein hodi fó nafatin oportunidade.

Bainhira Timor-Leste hahú tama iha situasaun emerjensia ho ameasa husi Corona Virus Deasses 2019 (Covid-19), Elia hahú ativu liu tan mosu iha media, tanba nia kargu nu'udar ministra interina ne'ebé tau-matan ba asuntu Covid-19.

Elia mós hahú kria konflitu kiik ho jornalista sira bainhira nia la fó oportunidade ba jornalista sira atu husu no koko atu halo 'intervensaun' ba independensia redasaun instituisaun media.

Aleinde ne'e, Elia mós fó informasaun ne'ebé la loos ba PM Taur kona-ba suspeitu Covid-19 iha Same, Munisipiu  Manufahi.

Lee mós: Deskonfia MS Interina Bosok PM Taur ba Suspeitu Covid-19 iha Same

PM Taur hato'o informasaun husi Elia iha Parlamentu Nasionál no ikus mai Diretora Serbisu Saúde Munisipiu Manufahi Florencia Tilman Corte-Real rezeita informasaun refere.

Xefe governu sei nafatin hatudu ninia pasensia no hahú mós fó sala ba Diretora Serbisu Saúde Manufahi, ba maneira hato'o resposta ne'ebé nia uza.

Maske nune'e, ema-nia pasensia iha limitasaun. PM Taur ikus mai deside hodi hasai Elia husi nia kargu nu'udar Vise Ministra Saúde.

PM Taur nia pasensia lakon bainhira Elia halo 'konfrontu' ho ekipa Gabinete Jestaun Krize ne'ebé PM Taur Lidera.

Iha Kinta (02/04), Elia hatudu asaun ida ne'ebé la merese. Iha tuku 15.00, Rui halo konferensia imprensa hodi aprezenta dadus Covid-19, maibé hafoin konferensia ne'e remata, Ministra Saúde interina Elia dos Reis Amaral mosu tan hodi halo fila fali konferensia imprensa no hato'o asuntu hanesan.

Ministra Elia mosu ho dadus ne'ebé diferente ho dadus ne'ebé Reprezentante SIJK hato'o.

Rui informa uluk katak, to'o ohin loron iha ema na'in 35 mak sai suspeitu ba Covid-19, husi númeru ne'e ema na'in 22 negativu, na'in ida pozitivu, no na'in 10 mak laiha kondisaun halo analiza.

Maibé, Elia hatete, mediku sira identifika ema na'in 23, na'in 10 halo ona teste no na'in ida mak pozitivu Covid-19, no na'in 12 nu'udar kazu foun.

Hafoin ministra interina remata ninia konferensia, Sekretariu Estadu Komunikasaun Sosial Mericio Juvinal ‘Akara’ to'o iha fatin no hato'o katak iha situasaun emerjensia iha komadu iha de'it, no informasaun ofisial tenke fó sai husi gabinete jestaun krize.

“See de'it mak halo informsaun hoax no infórmasaun pesoal, privadu, la reprezenta gabinete krize", dehan Akara.

Akara hatete, SEKomS ne’ebé resposavel ba komunikasaun sosial  no relasaun publiku asegura katak so gabinete jestaun krize mak iha kompetensia atu fó sai informasaun.

Maske serbisu interministerial, maibé Akara dehan, tenke kumpre komandu ida de'it.

"Primeiru Ministru mak superior no lidera," nia afirma.

Ho Eis MS Elia nia asaun ne'e, iha Sesta (03/04), Primeiru Ministru Taur Matan Ruak hasai despaisu hodi nomeia eis Ministru Saúde Rui Maria de Araujo nu'udar portavoz ba Gabinete Jestaun Krize.

Liu husi despaisu númeru 018/PM/IV/2020, loron 3 Abril 2020, kona-ba nomeiasaun portavoz Sala Situasaun, PM Taur nomeia dr. Rui Maria de Araujo nu'udar portavoz ne'ebé iha kompetensia tomak atu fó sai informasaun kona-ba Covid-19.

Aleinde despaisu ne'e, PM Taur mós hato'o pedidu ba Prezidente Repúblika Francisco Guterres Lu Olo hodi husu atu ezonera Elia husi nia kargu nu'udar Vise Ministra Saúde.

PR Lu Olo ne'ebé simu pedidu ne'e aseita ho desizaun PM Taur hodi hasai Eis Vise Minikstra Saude Elia husi nia kargu ne'ebé durante ne'e nia okupa.

PR Lu Olo liu husi dekretu númeru 30/2020, 3 Abril, deklara aseita ho pedidu PM Taur hodi ezonera Vice Ministra Saúde Elia dos Reis Amaral husi nia funsaun iha governu Konstitusional daulau.

Dekretu ne'e hahú tama iha vigor iha 3 Abril 2020.

Ho desizaun ne'e, Elia nia viajen nu'udar Vise Ministra Saúde mós remata ona. Go Home and Stay at Home, Elia.

Rate this item
(4 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items