Liu husi despaisu númeru 018/PM/IV/2020, loron 3 Abril 2020, kona-ba nomeiasaun portavoz Sala Situasaun, PM Taur nomeia dr. Rui Maria de Araujo nu'udar portavoz ne'ebé iha kompetensia tomak atu fó sai informasaun kona-ba Covid-19.
Iha despaisu ne'e, fó sai mós kona-ba estrutura ba Kombate Covid-19 mak hanesan; Kapitaun Mar no Guerra, Pedro Klamar Fuik atual Diretór IDN nu'udar Estadu Maior Kordenadór, Eis Ministru Saúde Sergio Lobo nu'udara koordenadór ba Forsa Tarefa ba Prevensaun no Mitigasaun ba Pandemia Covid-19, no eis Ministru Saúde no eis PM Ruia Maria de Araujo nu'udar Koordenadór Ligasaun Ofisial ba Forsa Tarefa no ezerese mós funsaun nu'udar portavoz Sala Situasaun.
Iha despaisu ne'e nomeia mós Diretora Jeral Prestasaun Saúde-Ministériu Saúde, Odete Viegas nu'udaar membru ba Gabinete Jestaun Krize.
Ho despaisu ida ne'ebe asina direitamente husi PM Taur ne'e bele hakotu ona duvida no intervensaun la nesesariu husi membru governu balun.
Tuir informasaun ne’ebe tempotimor.com hetan husi partidu CNRT dehan Sira nia parte maka propoin mos Dr. Rui Maria de araujo atu tama iha gabinete jestaun Krizi ne’e.
“Ha’u mos rekomenda duni naran Dr. Rui nian ba Primeiru Ministru,” dehan lideransa partidu CNRT ne’ebe ko’alia ho Tempotimor no husu atu labele publika sai nia naran.