Governu ne'ebé lidera husi Primeiru Ministru Taur Matan Ruak, aprezenta proposta levantamentu millaun $250 husi fundu petroliferu atu reforsa kofre estadu hodi finansia serbisu administrasaun públika to’o fulan Outubru 2020. Governu husu mós orsamentu adisional millaun $150 hodi antisipa despeza hasoru Covid-19, inklui rekuperasaun atividade ekonómika.

Ministra Finansa interina Sara Lobo Brires hatete milaun $250 seidauk inklui ba despeza ba Covid-19.

“Iha millaun $250 nia objetivu atu reforsa ita-nia saldu tezouru, la’ós ba despeza Covid-19 no nesesidade emerjénsia sira seluk,” dehan nia.

Vise Prezidente Bankada FRETILIN, Francisco Miranda Branco hatete, proposta adisionál milaun $150 ne’e pertinente hodi antesipa Covid-19, apoia vítima dezastre naturais no rekuperasaun ekonómiku.

“Ida adisionál ida ne’e importante atu rezerva, nune’e gabinete krize presiza bele jere hodi antesipa Covid-19 hodi responde ba situasaun ne’e, ami propoin aprova tán milaun $150,”dehan nia.

Deputadu Bankada  PLP, Noé da Silva apoia proposta husi bankada FRETILIN, tanba ema hotu preokupa situasaun tolu, situasaun polítika, inundasaun no Covid-19.

”Hanoin took, semana kotuk ita-boot sira dehan osan atu hira ita-boot sira apoia kombate Covid-19, maibé ohin ita-boot deside pozisaun oin seluk,” dehan nia.

Deputadu Partidu Demokrátiku, Adriano do Nascimento, hateten tau osan boot antesipa Covid-19 ne’e di'ak liu tán. Nune’e karik situasaun ne’e mosu deputadu sira la presiza mai debate tan iha Parlamentu Nasionál no presiza duni osan boot hodi sosa medikamentu saúde.

Maibé, Prezidente Bankada Partidu Demokrátiku (PD), Antonio da Conceicão dehan, tenke iha planu didi'ak no kálkulu mai husi governu nian.

"Proposta ida ne’ebé mai husi governu ne’e mak realísitiku liu, tanba ne’e mak ha'u hanoin ita mantein ho proposta milaun $250 ne’e,” dehan nia.

Ikus mai, maioria deputadu PN aprova de'it orsamentu millaun $250, enkuantu orsamentu adisional ho montante millaun $150 la pasa.

Realidade ne'e, kontrariu ho deklarasaun husi deputadu PD ne'ebé mós nu'udar Prezidente PD, Mariano Assanami Sabino.

Molok ne'e iha diskusaun ba pedidu estadu emerjensia, Assanami ho lian maka'as deklara katak deputadu no lider partidu politiku sira tenke hamriik iha liña dahuluk hodi prevene no luta hasoru Covid-19.

"Ha'u hanoin ekipa ida preventivu ne'e ita membru governu, deputadu sira, partidu polítiku sira labele izola aan, maibé hola parte iha Polisia no F-FDTL par halo mobilizasaun, bainhira moras afetadu maka'as, ita tenke apoiu populasaun, ita mak iha risku primeiru par molok povu mate, ita mate uluk tiha, se virus mak hili entaun hili uluk mak ita ida reprezenta ne'e, tanba di'ak mós ita reprezenta, aat mós ita reprezenta, moras mós ita reprezenta, se sira atu mate mós ita mak iha oin par mate uluk," dehan Assanami iha plenária PN, Kuarta (25/03/2020).

Tuir Assanami, Covid-19 nu'udar asuntu estra-ordináriu ne'ebé nasaun hotu hasoru, tan ne'e presiza aprova orsan hodi apoiu situasaun ida ne'e.

Tan ne'e, nia dehan, PD prontu apoiu orsamentu ne'ebé fó prioridade ba povu liu-liu atu halo prevensaun ba Covid-19.

"Tanba moras ida ne'e la'ós fó pensamentu ba kurativu de'it, mais preventivu ne'e sei maka'as liu. Komisaun ida ne'ebé forma ne'e ba kurativu ne'e hanoin di'ak, tanba eis ministru lubuk ida mak lidera iha ne'ebá, mais ita presiza preventivu ne'e mobilizasaun ida ne'ebé boot," dehan nia.

Maibé saida mak akontese? idaidak bele foti konkluzaun rasik.