Komando PNTL hato'o kestaun ne'e relasiona ho pandemia Corona Virus Deasses 2019 (Covid-19) no asaun Timor-oan balun iha rai li'ur ne'ebé fila mai Timor-Leste liu husi dalan ilegal.
Tuir dadus husi Komando Jeral PNTL, kada loron númeru ema tama husi dalan ilegal sa'e ba bebeik.
"Kuaze loron ida ema ne'ebé tama ilegal Polisia Nasional kaptura hamutuk 30 ate 40 pessoal," dehan Komandante Jeral PNTL Komisariu Faustino da Costa iha Palácio Prezidensial Nicolao Lobato Bairo-pité Dili, Kinta (02/04).
Tuir nia, bainhira komunidade sira iha area fronteira rai-maran mak fasilita Timor-oan balun iha rai li'ur tama husi dalan ilegal, sira fó risku ba sira-nia aan rasik no ba komunidade sira seluk, liu-liu sira ne'ebé hela iha area fronteira.
"Prekupasaun mak se karik ida ne'e lao mak ita-nia komunidade suporta ka apoiu fila fali, risku kona-ba moras ne'e sei bele sai boot liu tan," dehan .
Tan ne'e, Komisariu Faustino husu atu komunidade sira iha area fronteira kolabora ho PNTL no F-FDTL hodi bele prevene no minimiza risku Covid-19 tama iha TL.
"La hatene ita-nia maluk sira mai ne'e lori moras ka lae, entaun risku ne'e boot liu ba sira (iha fronteira)".
Tan ne'e, nia reforsa, importante tebes atu komunidade sira koopera ho autoridade seguransa iha ne'ebá.
