Aat liu tan, deputadu balun mós hahú buka oin hodi deklara prontu atu koa sira-nia salariu hodi bele ajuda sira ne'ebé hamriik iha liña oin ba luta hasoru Covid-19. Maske sira hatene momoos katak presiza iha lei molok koa salariu.
Realidade ne'e halo deputadu husi bankada Partidu Libertasaun Popular (PLP) no FRETILIN preokupa.
Prezidente bankada PLP Francisco Vasconcelhos dehan, deputadu sira iha PN halimar liu polítika duke preokupa ba povu nia moris ne'ebé dadaun iha ona perigu nia laran.
Deklarasaun deputadu ne'e relasiona proposta governu ne'ebé hatama ba parlamentu nasionál ho karater urjensia, maibé deputadu barak mak preokupa liu politika.
"Proposta ne'e ita debate ne'e ho karatér urjénsia, maibé tama ona semana ida ne'e, sorte ita-nia moras ne'e númeru seidauk aumenta, mak aumenta karik ema mate tan tiha ona, maibé deputadu sira sei deskute malu hela osan," dehan Vasconcelhos iha plenária PN, Kinta (02/04/2020).
Tuir deputadu ne'e, ema hirak ne'ebé hanaran an reprezentante povu halimar ho politika mak barak liu.
"Ha'u observa katak ita halimar polítika mak barak liu," nia dehan.
Deputada husi bankada FRETILIN Maria Angelica reforsa katak, deputadu sira iha PN halimar liu.
"Ita sei halimar iha ne'e, katak tau osan iha ne'e, iha ne'ebá, saida mak ne'e, situasaun hanesan ne'e ita sei halimar," dehan Angelica.
Ba kestaun ne'e, Prezidente bankada CNRT Duarte Nunes husu ba deputadu sira ne'ebé la gosta polítika iha PN di'ak liu fila ba uma toba tiha.
"Ha'u hanoin iha parlamentu ne'e mak ita halo desizaun polítika, se la halo polítika, fila ba uma, toba tiha, Parlamentu mak deside fó osan ka lae. Labele governu mai obriga ita fó osan, ne'e iha ne'ebé mak eziste, ha'u la hatene iha rai ne'ebé mak iha, favor fó hatene ha'u," dehan Duarte.
Tuir nia, PN seidauk aprova osan ne'e tanba konsidera governu la preparadu.
"Governu mak la preparadu, labele mai iha ne'e mak konsulta ho parlamentu," nia dehan.
Deputadu ne'e mós husu ba deputadu sira seluk, atu labele ameasa malu iha PN.
"Labele mai ameasa, ha'u gosta ema ameasa, mais di'ak liu ita la'o tuir regras demokrátiku, se ita hakarak muda, muda konstituisaun ne'e par ita halo tuir lei," dehan deputadu ne'e.