Diretór Jerál (DJ) Sekretáriu Estadu Formasaun Profesionál no Empregu (SEFOPE) Paulo Alves hato'o novidade di'ak ne'e katak, to'o ohin traballadór Timor-oan sira iha Australia no Korea Sul sei livre husi Covid-19.
"Ita hotu hatene katak iha públiku, balun nia familia, feen, laen serbisu iha iha rai li'ur, sira dúvida tanba sira pániku ho situasaun ne'ebé akontese, maibé ami hakarak relata de'it katak grasa ba Maromak tanba to'o agora ita-nia traballadór laiha ida mak infetafu ho corona virus, tantu iha Australia no Korea do Sul," dehan Paulo Alves liu husi konferensia imprensa iha edifísiu SEFOPE, Tersa (31/03/2020).
DJ ne'e espera katak Maromak sei proteze Timor-oan hotu, liu-liu sira ne'ebé serbisu iha rai li'ur atu iha saúde ne'ebé di'ak nafatin.
Iha oportunidade ne'e, DJ Paulo husu mós ba familia sira atu kalma nafatin no karik simu informasaun ruma bele konfirma direita ho SEFOPE.
"Familia sira ne'ebé iha Timor mak iha informasaun ruma bele mai konfirma direta ho SEFOPE par ita mantein kontaktu ho ita-nia adidu sira iha nasaun rua ne'e," dehan Paulo.
Entretantu, tuir dadus husi SEFOPE, trabaladór Timor-oan ne'ebé dadauk ne'e serbisu iha Australia na'in 1.201 no na'in 2.777 mak serbisu iha Korea Sul.