Iha situasaun daudauk ne'e, luvas no maskra sai nesesidade esensial ba profesional saúde sira hodi bele uza atu atende pasiente sira.

Diretór Ezekutivu SAMES Santana Martins, ho limitasaun ne'e SAMES deside atende de'it pedidu husi fasilidade esensial sira ne'ebé fó asistensia direitamente ba pasiente sira.

"SAMES sei atende de'it pedidu sira mai husi fasilidade essensiál sira ne'ebe fó assitensia saúde iha servisu nasionál ba saude hanesan Ospital Nasional Guido Valadares (ONGV), ospital referal sira no Servisu Munisipál Saúde no Sentru izolamentu no kuarentena ba Covid-19 no serbisu Laboratóru Nasional da saude, hodi nune'e bele asegura profesionais saude sira ne'ebé fó asistensia direita ba iha pasiente sira," dehan Santana iha nia knaar fatin Kampung Alor, Dili, Tersa (31/03/2020).

Ho nune'e, Santana hatutan, SAMES sei la atende pedidu husi instituisaun ka fatin seluk.

Atensaun mós ba Aimotuk

Diretór ezekutivu ne'e husu mós ba governu atu fó atensaun ba stok aimoruk iha SAMES.

"Stock disponibilidade ba medikamentus sira ne'ebé iha SAMES hanesan aimoruk, ita iha 364 item mak rezista iha baze dadus SAMES nian, nune'e husi 364 item ne'e, disponivel iha armajen mak 330 item ka 91% ba stock out no 34 item ka 9% iha armajen," dehan nia.

Nia hatete, maske daudauk ne'e stok aimoruk sei sufisiente, maibé presiza mós fó atensaun.

"Hanesan ita hatene katak stock aimoruk ne'ebé 91% husi 364 item ne'e ita labele dehan sufisiénte, maibé ita mós tenke haree, tanba dala-ruma ita preokupa demais ba Covid-19, maibé iha mós moras seluk mós agora la'o hela iha ita-nia rai hanesan dengue."

Tan ne'e, nia dehan, SAMES kontinua toma konsiderasaun, aleinde tau atensaun ba Covid-19, SAMES mós tau atensaun ba serbisu regular ne'ebé liga ho atendimentu pasiente husi moras baibain.