Xefe Aldeia Anin-fuik, Franzelino Maia informa, familia ne'e foin fila husi Indonezia iha Sabadu (28/03) tuku 23.30 oras Timor-Leste.
Bainhira idenfitika, nia dehan, nia parte hato'o kedan informasaun ba parte Ministériu Saúde (MS) hodi halo asaun.
Maibé, nia lamenta tanba MS la halo asaun lalais.
"Povu ne'ebé hakat liu fronteira mai Timor-Leste mak komunidade sira hetan informa ba parte saúde no PNTL, entaun komunidade kumpri i ami liga ba saude husi númeru telefone hodi konfirma, entaun sira dehan hein de'it, maibe ami hein to'o horikalan la mai to'o ohin i agora mak foin mai ne'e," dehan Xefe Aldeia ne'e.
Iha fatin hensan, Diretora Nasionál Kontrola Moras-Ministériu Saúde (MS) doutora Josefina Clarinha João dehan, MS simu informasaun husi autoridade lokal kona-ba prezensa familia ne'e iha Domingu (29/03).
Maibé, MS demora uitoan atu evakua tanba sei buka fatin kuarentena ba sira.
"Ohin mak ami foin mai, ne'e la'ós fallansu ka lae, maibé ita atu tau ema ruma iha kuarentena ne'e ita tenke hatene atu lori ema ne'e ba iha ne'ebé. Maske komunidade sira preokupa, maibé fó tempu ba ami atu buka fatin tanba ami mak sei lori ema ba tau iha kuarentena," dehan dra. Josefina iha Aldeia Anin-fuik, Segunda (30/03/2020).
Nia hatete, parte saúde tenke prepara fatin própriu, tanba iha kazu ne'e inklui mós labarik kiik.
"Ami tenke prepara fatin propriu, tanba iha kazu ne'e labarik kiik mós iha. Tan ho labarik kiik ne'e mak ami hadi'a fatin didi'ak par bele responde," dehan doutora ne'e
Iha oportunidade ne'e nia apela ba komunidade sira karik hetan kazu hanesan ne'e labele ba hobur, maibé tenke dook, tanba bele fó perigu ba ema-nia vida.