Timor-oan ne'e, ho naran inisial SVM ne’ebe husu midia labele publika nia naran kompletu ne’e, mai husi Amsterdam, Olanda, iha semana kotuk no transit iha Singapura.
Iha Singapura, SVM dehan, nia tama kuarentena durante semana ida hafoin tuir teste mediku hodi bele hatene Timor-oan ne'e livru husi Covid-19 ka lae.
Rezultadu teste halo SVM kontente, tanba mediku sira deklara nia livre husi Covid-19 nune'e nia bele kontinua viajen mai TL.
"Ha'u viajen husi Ámsterdam mai Singapura, depois atu liu ba Bali mak ha'u nia billete kanseladu, nune'e ha'u iha Singapura loron neen hela iha Kuerentena, depois tuir teste médiku ho rezultadu negativu ka normal. Tanba ne'e mak autoridades aeroportu Singapura nian autoriza ha'u liu mai Dili ohin. Ha'u sai husi Singapura madrugada, ha'u haluha oras tuku hira mak ne'e", dehan SVM iha aeroportu Komoro.
Timor-oan ne'e dehan, hafoin hetan autorizasaun, horseik, Sabadu (28/03), nia sosa bilete aviaun.
"Horseik ha'u sosa ticket, ha'u mós la hatene, katak, ohin ne'e ha'u mesak mak mai. Ha'u iha aviaun laran ho pramugari na'in rua, no pilotu na'in rua . Ha'u mós hakfodak tanba ha'u mesak mak iha aviaun laran", dehan foin sa’e husi Letefoho ne’e.
SVM servisu iha Inglatera dezde tinan 2017.